XXVI з’езд Камуністычнай партыі Савецкага Саюза
У атмасферы творчасці, дзелавітасці і згуртаванасці праходзіць работа з’езда. Яго дэлегаты, уся наша партыя, савецкі народ успрынялі як дакумент велізарнага гістарычнага значэння справаздачны даклад ЦК КПСС, з якім выступіў таварыш Л. І. Брэжнеў. У дакладзе ўвасоблены мудрасць і высокая адказнасць партыі за лёс краіны.
У Браславе будзе свой цеплаход
На Браслаўшчыну даставілі па вялікай вадзе з Віцебска цеплаход. З Друі ў Браслаў яго прыцягнулі трактарысты ПМК-44. Гэты цеплаход будзе ўстаноўлены на гарадскім пляжы на возеры Дрывяты. У ім размесцяцца службы выратавальнай станцыі. Побач абсталююць спецыяльныя прычалы для лодак і кацераў.
Горад расце
На карце горада з’явіліся дзве новыя вуліцы — Энергетыкаў у раёне Заборных Гумнаў і Заводская, што пралягла паблізу гароднінасушыльнага завода паралельна вуліцы Чайкоўскага. Будаўніцтва тут вядуць індывідуальныя забудоўшчыкі.
Сямейныя ўрачыстасці
Работнікі гароднінасушыльнага завода Васіль і Надзея Смолякі, Тадэвуш і Ірына Петкуны зарэгістравалі нараджэнне першынцаў-дзяўчынак. Першынцы з’явіліся і ў сем’ях браслаўчан Міхаіла і Ірыны Канапацкіх, Мікалая і Таццяны Каламыцавых. Маладых бацькоў павіншавалі таварышы па працы, родныя і блізкія.
Дружна, арганізавана
Аднагалосную падтрымку выказаў калектыў торфабрыкетнага завода пачыну масквічоў ударнай працай адзначыць ленінскі суботнік. У ім прымуць удзел 105 чалавек. У фонд пяцігодкі, па папярэдніх разліках, будзе пералічана 600 рублёў.
У працы нараджаюцца героі
Урачысты вечар ушанавання перадавікоў калгаса “Маяк” правялі работнікі раённай
бібліятэкі. Мерапрыемства вельмі ўразіла юнакоў і дзяўчат. Яны яшчэ раз пераканаліся ў велічы самаадданай працы, шчыра апладзіравалі яе героям, крыху зайздросцілі ім.
Шануемая старасць
Больш за 50 чалавек састарэлага ўзросту, якія не маюць родных, жывуць у Браслаўскім доме састарэлых. Клопат пра іх узяла на сябе дзяржава. Старыя жывуць у чыстых, утульных пакоях, повар рыхтуе ім смачныя снеданні, абеды і вячэры, медсястра сочыць за станам здароўя. Да іх паслуг таксама кнігі, газеты, часопісы, тэлевізар.
Новыя мадэлі адзення
У мінулым годзе швейнікі і трыкатажнікі РКБА распрацавалі і ўкаранілі ў вытворчасць 23 новыя мадэлі верхняга жаночага адзення і трыкатажных вырабаў, якія карыстаюцца ў заказчыкаў асаблівай папулярнасцю.
Там патрэбны рабочыя рукі
Вынікі вайны адгукаюцца і цяпер. Напрыклад, у Расонскім і Верхнядзвінскім раёнах пасля вогненнага ліхалецця амаль не засталося карэннага насельніцтва. Таму арганізавана перасяленне сем’яў у калгасы і саўгасы гэтых раёнаў на льготных умовах. Дзяржава выдае грашовую дапамогу ў суме 50 рублёў на галаву сям’і і па 17 рублёў 50 капеек на кожнага яе члена, прадастаўляецца жылы дом ці кватэра.
Лясныя гідрабудаўнікі
У нашым раёне бабры з’явіліся ўпершыню ў 1963 годзе ў Богінскім лясніцтве. Цяпер звяркоў можна сустрэць і ў іншых, але колькасць іх яшчэ невялікая. Таму важным мерапрыемствам з’яўляецца ахова бабрыных паселішчаў ад браканьераў. Гэта абавязак кожнага работніка лесу, кожнага грамадзяніна.
Старонкі газеты гартала
Жанна Бялько.
