Прыкладна паўтара года таму назад механізатар ААТ «Друйскі» Фёдар Ерашонак атрымаў ключы ад новенькага «Амкадора». Такі давер ён апраўдвае плённай карпатлівай працай і сваім майстэрствам спраўляцца з магутным пагрузчыкам.

На першым працоўным месцы ў калгасе Фёдар вадзіў аўтамабіль, кіраваў трактарам, а ў 2008 годзе старшыня прапанаваў яму паспрабаваць сябе на іншай тэхніцы – «Амкадоры». Згадзіўся.

Гэта цяпер, праз 16 гадоў практыкі, вадзіцель лёгка спраўляецца з вялізнай машынай і ювелірна выконвае даручаную работу, а спачатку, як успамінае сам, не адразу знайшоў падыход да гэтага гіганта. Ф. Ерашонак на сваім «Амкадоры» выконвае шэраг задач: чысціць і грэйдзіруе дарогі, трамбуе сянаж ды сілас у траншэі, дапамагае падчас будаўнічых работ, выконвае пагрузку і разгрузку розных матэрыялаў, кармоў для БРЖ і інш. Для такой універсальнай машыны ў гаспадарцы заўсёды знойдзецца работа.

Застаць дома Фёдара Ерашонка ў гарачы сезон, безумоўна, складана, бо працуе ён з раніцы да позняга вечара, а вось зімой мае час дапамагаць жонцы па гаспадарцы. Дарэчы, у ААТ «Друйскі», дзе працуе механізатар, ёсць добрая традыцыя: па выніках года заахвочваць работнікаў і дарыць ім па цяляці. Так пагалоўе БРЖ гэтай сям’і і папаўняецца дзякуючы самаадданай працы Фёдара.

Відавочна, што працаваць у сельскай гаспадарцы складана, але механізатар лічыць: калі справа па душы, то на цяжкасці не зважаеш. ■

Вольга ПАТАПОВІЧ. Фота аўтара