Вадзіцель транспартнага ўчастка камунальнага ўнітарнага прадпрыемства жыллёва-камунальнай гаспадаркі «Браслаў-камунальнік» Яўгеній Яблонскі доўга не раздумваў, кім яму быць. Перад вачамі знаходзіўся станоўчы прыклад бацькі, які амаль увесь свой працоўны шлях правёў за баранкай аўтамабіля ў жыллёва-камунальным прадпрыемстве.
Іосіф Станіслававіч, можна сказаць, за руку і прывёў свайго сына з вадзіцельскім пасведчаннем, атрыманым у вучэбнавытворчым камбінаце, у «Браслаў-камунальнік» адразу пасля атрымання школьнага атэстата. Да восеньскага прызыву юнак пабыў вучнем слесара ўчастка кацельняў і цеплавых сетак, а пасля армейскай службы вярнуўся на сваю малую радзіму і ўжо 1 снежня 1995 года быў назначаны вадзіцелем транспартнага ўчастка «Браслаў-камунальніка».
Не злічыць, колькі з таго часу перавёз Яўгеній разнастайных грузаў для патрэб свайго прадпрыемства. І ў лютым пайшоў ўжо 13-ы сезон, калі самы напружаны для яго перыяд – зіма. У лістападзе ён абсталёўвае свой МАЗ адвалам і механізмам для пасыпкі гарадскіх вуліц супрацьгалалёднай сумессю і да красавіка ні днём, ні ноччу не адыходзіць ад мабільнага тэлефона, бо ў любы момант дыспетчар можа выклікаць вадзіцеля спецтэхнікі на працу. У час снегападу Я. Яблонскі выязджае з гаража ўжо ў 3 – 4 гадзіны раніцы, каб паспець да пачатку працоўнага дня расчысціць асноўныя гарадскія вуліцы і пасыпаць іх пясчана-солевай сумессю.
Нельга сказаць, што і летні перыяд праходзіць для вадзіцеля першага класа бестурботна. Акрамя вывазу змёту, рознага смецця з гарадской тэрыторыі, пастаўкі другасных матэрыяльных рэсурсаў у Мінск, іншых гаспадарчых спраў на самазвале, за ім замацавана яшчэ і палівамыечная машына, якая ў летнюю спёку дастаўляе жыватворную вільгаць для саджанцаў, кветак і газонаў.
Каторы год запар Яўгеній аказвае яшчэ і шэфскую дапамогу сельгаспрадпрыемствам у час жніва: звычайна ў «Слабодцы-агра» адвозіць на МАЗе намалочанае камбайнамі збожжа. На любым участку работы, па словах кіраўніцтва «Браслаў-камунальніка», Я. Яблонскі выдатна выконвае даручэнні, бо характарызуецца высокай працаздольнасцю, добрасумленнасцю, адказнасцю і высокім прафесіяналізмам, дзякуючы якому яго аўтамабіль падтрымліваецца ў спраўным стане і гатовы ў любы час выехаць на лінію пры ўзнікненні вытворчай неабходнасці. ■
