Афрыка даўно прачнулася, без яе свет развівацца не можа. Менавіта таму мы тут. Пра гэта Аляксандр Лукашэнка заявіў па выніках перамоў з прэзідэнтам Зімбабвэ Эмерсанам Мнангагвай.
«Без Афрыкі не можа быць перспектывы ў свеце наогул. Тут рэсурсы, тут людзі з кожным годам становяцца ўсё больш адукаванымі, сюды ідуць сучасныя тэхналогіі. Без Афрыкі свет развівацца не можа», – упэўнены Прэзідэнт Беларусі.
«Таму мы тут. Гэта нашы сябры. Мы прыехалі да сяброў. Мы з імі дамаўляемся ў імя нашых народаў. Мы ідзём з мірам. Мы не ідзём, як калісьці ішлі каланісты, як яны захоплівалі, эксплуатавалі народ. Мы нясём сюды тэхналогіі і навучаем тут ім людзей, рыхтуем спецыялістаў», – адзначыў кіраўнік нашай дзяржавы, кажучы пра супрацоўніцтва з краінамі Афрыканскага кантынента.
На гэтым фоне Беларусь і Зімбабвэ падчас дзяржаўнага візіту Аляксандра Лукашэнкі прынялі цэлы пакет двухбаковых дакументаў.
Так, у прысутнасці кіраўнікоў дзяржаў падпісаны пагадненні і мемарандумы аб супрацоўніцтве ў сферы прамысловасці, сельскай гаспадаркі, гандлю, адукацыі, падаткаабкладання, энергетыкі, транспарту, здабычы карысных выкапняў і нават устанаўленні пабрацімскіх адносін паміж гарадамі Мінск і Харарэ. Дасягнутыя дамоўленасці па падрыхтоўцы спецыялістаў па ўсіх цікавых для зімбабвійскага боку напрамках. Беларусь адкрыла пасольства ў Зімбабвэ і чакае, што ў хуткім часе і ў Мінску з’явіцца дыппрадстаўніцтва гэтай краіны.
Што датычыцца канкрэтных кантрактаў, то такія ўжо заключаны на пастаўку ў Зімбабвэ беларускай трактарнай і збожжаўборачнай тэхнікі, абсталявання беларускай вытворчасці для будаўніцтва і мадэрнізацыі комплексаў захоўвання збожжа, а ў перспектыве – для лясной прамысловасці.
Паводле слоў беларускага лідара, мы таксама вітаем уваходжанне зімбабвійскага капіталу ў капітал нашых прадпрыемстваў, не выключаем працу па бартэрных схемах.
«Патэнцыял нашага ўзаемадзеяння велізарны. І я ўпэўнены, рэгулярныя прамыя кантакты рознага ўзроўню дазволяць раскрыць яго найлепшым чынам», – рэзюмаваў Аляксандр Лукашэнка. ■
Па матэрыялах БелТА