Міністэрства сельскай гаспадаркі і прадуктаў харчавання падвяло вынікі работы жывёлагадоўчай галіны за студзень — сакавік 2020 года.
У вытворчасці малака ў цэлым па рэспубліцы за ўзгаданы перыяд захавалася ранейшая тэндэнцыя: лідары зноў прыбаўлялі, аўтсайдары мінусавалі. Праўда, наш раён у першым квартале стаў выключэннем з агульнай карціны.
За апошнія тры гады ў малочнай галіне склалася не надта прыгожая сітуацыя, калі першыя месяцы года нашы жывёлаводы ўвогуле зніжалі і зніжалі надоі. Дык вось сёлета сярэдні надой на карову ўрэшце вырас: прыбаўка склала 12 кілаграмаў. Цяпер жа, калі дойны статак перайшоў на зялёныя кармы, можна спадзявацца, што гэтая тэндэнцыя захаваецца, тым больш што пашавы перыяд мы пачалі з рэгулярных прыбавак сярэднясутачных надояў. Так, напрыклад, з 5 мая за дваццаць дзён сярэднясутачны надой па раёне ўзрос на 1,57 кг і склаў 8,49 кг. Безумоўна, найбольшая прыбаўка малака з выхадам на пашу атрымалася ў тых, хто ў хляве даіў мала. Значна прыбавілі КУСП «Браслаўскі» (+2,52), «Відзаўскі» (+2,43 кг), ААТ «Бярозавы край» (+1,81 кг). Мізэрна мала — крыху больш за 4 кг ад каровы — па сённяшні дзень дояць толькі ў «Мяжанах» і «Слабодцы-агра». «Маяк Браслаўскі» набліжае сярэднясутачны надой да 22 кілаграмаў.
Калі ж перайсці на мову лічбаў, то ў першым квартале вытворчасць малака ў рэспубліцы выглядае наступным чынам:
– ад кожнай каровы надоена па 1 270 кілаграмаў, а валавая вытворчасць вырасла на 6,1 % (1 796 039);
– у Віцебскай вобласці сярэдні надой узрос на 56 кг і склаў 910 кг, валавая прыбаўка дасягнула 6,2 %;
– Браслаўшчына з надоем у 603 кілаграмы размясцілася на 109 месцы са 118. А вось валавая вытворчасць прадукта знізілася аж на 8 %: за тры месяцы ад грамадскага статка было надоена 4 269 тон малака. Асноўная прычына — скарачэнне дойнага пагалоўя. Нагнаць жа страчанае можна за кошт росту яго прадукцыйнасці. ■
