Міністэрства сельскай гаспадаркі і прадуктаў харчавання падвяло вынікі работы жывёлагадоўчай галіны за 9 месяцаў бягучага года.
Мяркуючы па паказчыках трох кварталаў, падкрэсліваюць спецыялісты міністэрства, малака і мяса ў гэтым годзе будзе атрымана больш, чым летась. Прыбаўка ў 1,7 і 1,3 працэнта адпаведна дае падставы разлічваць, што валавыя надоі і прывагі будуць важкімі.
За ўзгаданы перыяд у сельгаспрадпрыемствах рэспублікі ад кожнай каровы надоена па 3 720 кг малака, што на 65 кілаграмаў больш, чым годам раней. У Віцебскай вобласці прадукцыйнасць дойнага статка зафіксавана ў 3 217 кілаграмаў з прыбаўкай да леташняй у 123. Валавая вытворчасць да мінулагодняй павялічылася на 1,7 і 1,1 працэнта адпаведна.
Са 118 раёнаў Браслаўскі па сярэдніх надоях заняў 103 месца, гэта на 7 пунктаў вышэй за паказчык па выніках работы за 6 месяцаў. Ад кожнай каровы нашы сельгаспрадпрыемствы надаілі па 2 763 кг малака, што на 263 больш, чым было летась. Валавы надой павялічыўся на 5,1 %. Такая прыбаўка стала магчымай не толькі дзякуючы павелічэнню прадукцыйнасці дойнага статка, а і больш высокай таварнасці прадаваемай прадукцыі. Калі па рэспубліцы таварнасць малака склала 89,8 %, па вобласці — 89,5, то ў нашым раёне — 91,3 %. Па гэтым паказчыку ў вобласці мы дзелім з Верхнядзвінскім раёнам першае месца і ў рэспубліцы — восьмае. Комплекс па вырошчванні БРЖ ААТ “Агравідзы” з 79 аднатыпных займае 54 месца. Там на сярэднюю галаву з пачатку года атрымана 169,94 кг прываг, пры сярэднясутачных у 631 грам з прыбаўкай у 149 гр.
■ Падрыхтаваў Аляксандр АЗЕВІЧ.
