Аляксандр Лукашэнка: усе раёны ў Беларусі па ўзроўні развіцця павінны стаць не горшыя за Шклоўскі

Аляксандр Лукашэнка падкрэсліў, што хоць Шклоўскі раён і з’яўляецца яго малой радзімай, але ў яго аналагічнае стаўленне да любога іншага куточка Беларусі, і асабліва да так званых мядзведжых кутоў.

На семінар-нараду запрошаны кіраўнікі ўсіх 118 раёнаў Беларусі, каб пераймаць вопыт, дзяліцца ўласнымі практычнымі напрацоўкамі. «Галоўнае ў тым, каб вы, убачыўшы, зрабілі гэта ў сябе», — звярнуўся кіраўнік дзяржавы да ўдзельнікаў мерапрыемства.

Прэзідэнт пры гэтым падкрэсліў: ён далёкі ад меркавання, што Шклоўскі раён даведзены да ідэальнага стану, што тут усё зроблена. Гэта, хутчэй, сярэдні раён. Але было б нядрэнна, каб усе раёны былі прынамсі такімі. А тыя раёны, якія значна лепшыя за Шклоўскі, ні ў якім разе не страцілі свае пазіцыі. «У краіне дастаткова такіх раёнаў (з больш высокім узроўнем развіцця. — Заўвага БЕЛТА). Але тыя, якія трэба «з падвала даставаць» і сераднячкі — гэта Шклоўскі раён — яны павінны быць такімі», — растлумачыў кіраўнік дзяржавы.

Аляксандр Лукашэнка звярнуў увагу, што ў Шклоўскім раёне імкнуліся не толькі ствараць новае, але і аднаўляць і развіваць аб’екты, якія засталіся з часоў Савецкага Саюза.

Асаблівы акцэнт кіраўнік дзяржавы зрабіў на прыродных рэсурсах краіны: «Галоўнае, чым заўсёды будзе займацца Беларусь, — гэта лесаперапрацоўка, дрэваапрацоўчыя прадпрыемствы і сельская гаспадарка. Гэта два напрамкі, ад чаго ніколі не адмовяцца ў Беларусі». І ў Шклоўскім раёне якраз ёсць прадпрыемствы, якія працуюць менавіта ў гэтых сферах.

«Шклоўскі раён — гэта кропка, якую трэба развіваць. Тут створана ўсё неабходнае (для развіцця. — Заўвага БЕЛТА). Далей — упірайцеся і пачынайце працаваць. Кантроль будзе вельмі жорсткі. Гэта я вам абяцаю», — сказаў Прэзідэнт у адрас мясцовых кіраўнікоў.

Аляксандр Лукашэнка падкрэсліў, што на кіраўнікоў у рэгіёнах ускладзена каласальная адказнасць, паколькі менавіта эканамічна моцныя рэгіёны з’яўляюцца адным з ключавых прыярытэтаў праграмы сацыяльна-эканамічнага развіцця, прынятай на Усебеларускім народным сходзе. Прэзідэнт нагадаў, што раней у краіне былі вызначаны апорныя населеныя пункты — паўтары тысячы аграгарадкоў, якія неабходна развіваць, каб там жылі людзі.

Кіраўнік дзяржавы звярнуўся да пытання ўзбуйнення і аб’яднання гаспадарак. Важна, каб да гэтага працэсу падыходзілі ўдумліва, а не проста навешвалі «гіры на ногі» больш эфектыўным прадпрыемствам, што ў канчатковым выніку можа негатыўна паўплываць і на іх работу. «Не спяшайцеся аб’ядноўваць. Аб’ядноўваць трэба пад нешта», — сказаў Аляксандр Лукашэнка.

Не менш важнае і кадравае пытанне, пачынаючы ад механізатараў. Дасведчаныя спецыялісты павінны быць замацаваны за энерганасычанай дарагой тэхнікай.
Прэзідэнт канстатаваў, што за апошнія дзесяцігоддзі шмат сельскага насельніцтва пераехала ў гарады. «Людзей з вёскі забралі — трэба дапамагаць. Не трэба адыходзіць ад шэфскай дапамогі. Або перадаваць ва ўласнасць, як філіялы (размова пра перадачу гаспадарак у распараджэнне прампрадпрыемстваў. — Заўвага БЕЛТА). Але ў гэтых адносінах рухацца. Гэта добры варыянт», — дадаў ён.