Прэзідэнт Беларусі Аляксандр Лукашэнка 23 сакавіка падпісаў Указ № 100 «Аб правядзенні экстракарпаральнага апладнення». Дакумент прыняты ў мэтах развіцця дзеючай праграмы дзяржаўнай падтрымкі па ЭКА і прадугледжвае пашырэнне даступнасці дапаможных рэпрадуктыўных тэхналогій для жанчын, якія жадаюць стаць маці.
Дзякуючы дзеючай праграме ЭКА ў Беларусі нарадзіліся 2 528 дзяцей, што даказала яе эфектыўнасць і запатрабаванасць. Дзяржавай на гэтыя мэты накіравана каля 28 млн руб.
Указам прадугледжваецца правядзенне дзвюх бясплатных спроб ЭКА замест адной. Скарыстацца імі змогуць не толькі замужнія жанчыны, але і тыя, хто не знаходзіцца ў шлюбе. Прадастаўляць дзве спробы будуць пры выкананні некалькіх умоў. У іх ліку – узрост жанчыны, які не перавышае 40 гадоў, а таксама наяўнасць медыцынскіх паказанняў пры адсутнасці проціпаказанняў да правядзення працэдуры.
У выпадку, калі першая прадастаўленая бясплатна спроба ЭКА была паспяховай і цяжарнасць завяршылася нараджэннем дзіцяці, за жанчынай захоўваецца права на другую працэдуру ЭКА на бюджэтнай аснове да дасягнення ёю ўзросту 49 гадоў.
Выкананне ЭКА, як і раней, будзе праводзіцца ў дзяржаўных установах аховы здароўя, пералік якіх вызначаецца Саветам Міністраў.
Прыняцце дакумента дасць магчымасць павысіць дзяржаўную сацыяльную падтрымку беларускіх жанчын, прадаставіць ім дадатковыя магчымасці ў галіне аховы рэпрадуктыўнага здароўя.
«Вядома, дзеці – гэта святое. Вы маё стаўленне да дзяцей ведаеце. Таму я як Прэзідэнт, а вы як мае падначаленыя – мы павінны рабіць усё (і не толькі ў Год жанчыны), каб жанчына была шчаслівая. А якое шчасце ў жанчыны, калі ў яе няма дзяцей? Дзеці – гэта шчасце нашай жанчыны», – падкрэсліў кіраўнік дзяржавы. ■
Паводле матэрыялаў БелТА.
