Майстар на ўсе рукі, так адгукаюцца літаральна ўсе на мясцовым хлебазаводзе пра токара Івана Шнітко. Больш за 30 гадоў ён працуе на прадпрыемстве і дасканала ведае «слабыя месцы» як тэхналагічнага абсталявання, так і ведамаснага аўтамабільнага транспарту.
Шмат гадоў таму назад Іван пасля заканчэння Слабодкаўскай школы пайшоў у тэхналагічнае вучылішча ў Віцебску, дзе атрымаў спецыяльнасць токара. Так аднойчы абраная прафесія стала справай усяго жыцця.
Пасля вучылішча І. Шнітко тачыў металічныя дэталі для аўтатранспарту АТП № 18, Полацкай аўтакалоны, а з 1992 года трывала замацаваўся на Браслаўскім хлебазаводзе. З таго часу нельга нават злічыць, колькі валоў, утулак, шасцярнёў вытачыў ён для гаспадарчых патрэб прадпрыемства. Іван не проста токар. Хоць яго майстэрня абсталявана двума такарнымі, фрэзерным, свідравальным і затачным станкамі, але падчас рамонту ніяк не абысціся і без звычайнага ручнога інструменту.
І. Шнітко ніколі не абмяжоўваецца толькі сваімі абавязкамі токара, а разам са слесарамі скрупулёзна ліквідуе тэхнічныя непаладкі механічнага абсталявання, за што яго і шануюць. ■
Казимир ПЕТУШКО
