Абноўлены праект указа па развіцці аграэкатурызму ў Беларусі абмеркавалі на нарадзе кіраўніка дзяржавы Аляксандра Лукашэнкі з кіраўніцтвам Савета Міністраў.
«Некалі я згадзіўся і даў старт гэтаму цудоўнаму працэсу. Каб людзі, якія жывуць у вёсцы, змаглі паказаць нашу прыроду іншым. Тым больш іншаземцы прыязджаюць. Каб уладальнікам аграсядзіб прадаставіць ільготы, каб яны маглі зарабіць, каб даць штуршок развіццю гэтых хутароў, – сказаў Прэзідэнт. – Сфера вельмі значная ў плане мадэрнізацыі і развіцця сучаснай інфраструктуры ў вёсцы, стварэння рабочых месц, захавання і прымнажэння нашых нацыянальных культурных традыцый, выхавання беражлівага стаўлення да прыроды».
Аднак кіраўніку дзяржавы дакладваюць, што асобныя нормы ўказа, які рэгулюе сферу аграэкатурызму (ад 9 кастрычніка 2017 г. № 365), выконваюцца фармальна. У якасці прыкладаў прыводзяцца канкрэтныя факты. Так, не выкаранены выпадкі, калі пад выглядам аграсядзіб на сістэмнай аснове працвітаюць гасцінічны і рэстаранны бізнесы, асабліва паблізу вялікіх гарадоў. Падаткі пры гэтым плацяцца далёка не ў адпаведнасці з відам дзейнасці.
Прэзідэнт запатрабаваў акрэсліць прапановы: што плануецца для ўпарадкавання дзейнасці нядобрасумленных уладальнікаў аграсядзіб, якія ператварылі іх выключна ў гасцінічныя комплексы.
Аляксандр Лукашэнка таксама пацікавіўся, як такая ініцыятыва паўплывае на сядзібы, размешчаныя далёка ад вялікіх гарадоў: «Яны перажылі няпросты каранавірусны час, працуюць сумленна і прадаўжаюць карпатліва год за годам развіваць свой патэнцыял. Адна справа – каля буйных гарадоў на бойкіх месцах пад выглядам аграэкасядзіб арганізавалі гасцініцы і рэстараны, а іншая – гэтыя ж аграсядзібы, якія створаны ў «мядзвежых» кутках».
«І, што вельмі важна, як прапанаваныя змяненні будуць стымуляваць развіццё рэгіянальнай ініцыятывы і канкрэтных тэрыторый?» – паставіў пытанне беларускі лідар. ■
Па матэрыялах БелТА
