ЦЁПЛАЕ ВОГНІШЧА ДЛЯ ВЯЛІКАЙ СЯМ’І
Яўген і Кацярына Дземідовічы цвёрда ўпэўнены: шчасце — у дзецях. Абое выраслі ў шматдзетных сем’ях і вельмі добра ўсвядомілі, што дружнай камандай і з работай лягчэй справіцца, і святы весялей адзначаць. І калі маладыя запалілі сваё сямейнае вогнішча, то адразу вырашылі, што саграваць яно будзе вялікую сям’ю.
Неўзабаве маладыя бацькі з радасцю калыхалі свайго першынца, праз год на свет з’явілася дачушка, а за ёй — яшчэ адзін сынок.
— Дзеці былі спакойныя, — кажа жанчына, — і асаблівых цяжкасцей, пакуль яны гадаваліся, не адчувала.
На той час Дземідовічы жылі ў Быстрамаўцах разам з бацькамі Кацярыны, а ў вёсцы, як вядома, без гаспадаркі ды агародаў не абысціся. Таму даводзілася яшчэ і на гэтым «фронце» паспяваць. Яўген працаваў у мясцовай гаспадарцы і нярэдка ад цёмнага да цёмнага. Таму дапамога бабулі ў выхаванні дзетак была вельмі каштоўнай.
Любячыя бацькі заўсёды імкнуцца стварыць для сваіх крывінак найлепшыя ўмовы для іх развіцця і станаўлення. І калі ў вёсцы закрылі школу, сям’я пераехала ў Браслаў. Спачатку жылі ў здымным доме, дзе даводзілася мірыцца з некаторымі нязручнасцямі. Але, галоўнае, у Яўгена была работа, сыны і дачка пайшлі ў добрую школу. Кацярына тым часам калыхала яшчэ адно дзіця — маленькую Дашу.
Дземідовічы атрымалі мацярынскі капітал, а ў хуткім часе і новую кватэру, у якой нарадзіўся Паўлуша.
РОЗНЫЯ, АЛЕ ШЧАСЛІВЫЯ РАЗАМ
У прасторнай і ўтульнай кухні за кубачкам гарбаты з цікавасцю слухаю пра насычанае жыццё вялікай і дружнай сям’і.
Старэйшы Марат сур’ёзны і разважлівы, ён вучань 8 класа другой гарадской школы, радуе бацькоў сваімі выдатнымі адзнакамі. У гэтым годзе хлопец свядома выбраў клас МНС. І свой выбар пракаменціраваў па-даросламу:
— Мужчына заўсёды павінен ведаць, як дзейнічаць у экстрэмальных абставінах. Да таго ж падабаецца дапамагаць іншым. Таксама Марат цікавіцца тэхнікай і кожную вольную часіну разам з бацькам перабірае і сямейны аўтамабіль, і вялікі лесавоз, на якім працуе Яўген.
Яшчэ адно захапленне хлопца — рыбалка. І, як сапраўдны гаспадар, ён вельмі рады, калі злоўленай рыбы хапае на сямейную вячэру.
Мастацкая натура сямікласніцы Евы адбіваецца ў прыгожых малюнках, на якіх з’яўляюцца жывёлы, прырода і ўласныя мадэлі сукенак. Малодшай сястры малюе лялек і адзенне для іх, потым разам гуляюць з імі. А вось Яўгену-меншаму падабаецца ляпіць з пластыліну. Хлопец карпатліва вырабляе кожную дробязную дэталь сваіх фігур. У большасці гэта мадэлі танкаў. Зацікаўленасць малодшых Дашы і Паўла пакуль што заключаецца ў гульнях і праглядзе мультфільмаў.
— Вялікае шчасце, — кажа Кацярына, — чуць слова «маці», а калі яно паўтараецца некалькі дзясяткаў разоў, то і шчасце павялічваецца. Так, у кожнага свой характар, свае погляды, але менавіта гэта нас і яднае.
Зразумела, большасць хатніх клопатаў кладзецца на плечы жанчыны. Толькі адной бульбы трэба пачысціць больш за два кілаграмы, а потым яшчэ напячы дранікаў — любімай стравы сям’і. Выслухаць усіх дзяцей, даць ім слушную параду, нікога не абмінуць пяшчотай. Здаецца, шматдзетнай маці і дыхнуць няма калі. Тым не менш Кацярына знаходзіць час на прыгожыя вырабы са стужак. Як адзначае жанчына, за гэтай карпатлівай справай яна адпачывае і супакойваецца.
У пытаннях выхавання дзяцей Яўген і Кацярына адзіныя: тлумачэнні і ўгаворы дадуць лепшы вынік, а калі ўсё ж такі трэба «прыструніць», то без злосці і крыку. Мір і згода ў шматдзетнай сям’і, адзначыў Яўген, — цярплівая работа абаіх бацькоў, бо толькі так можна стварыць адзіную сямейную каманду. ■
Алена ПЯТУШКА.
Фота аўтара.
По традиции ежегодно накануне 9 мая в соответствии с указом Президента Беларуси Александра Лукашенко выплачивается…
Может ли хрупкая женщина успешно возглавлять секретную службу и наравне с офицерами-мужчинами достойно, говоря уставным…
На неудовлетворительное состояние отдельных улиц микрорайона Муражи города Браслава местные жители обратили внимание еще в…
По всей Беларуси тезисы Всебелорусского народного собрания продолжают оставаться главной темой для обсуждения. Его делегаты…
В эти дни у Евгения Набеева, режиссера народного театра и театра миниатюр «Покер» Браславского РЦК,…
На прошлой неделе в Браславе прошел День призывника. В его рамках повестки получили 20 юношей,…