Першы дзень зімы традыцыйна супадае са святам усіх юрыстаў, незалежна ад профілю і сферы дзейнасці. Іх роля значная як у жыцці ўсёй краіны, так і ў рабоце асобных прадпрыемстваў і арганізацый, а таксама ў фарміраванні прававой культуры ў грамадстве.

Адзін з прадстаўнікоў гэтай прафесіі — юрысконсульт, які вядзе прававую абарону сваёй арганізацыі і сочыць за тым, каб яе дзеянні вяліся ў адпаведнасці з законам.

Амаль сем гадоў усе бягучыя справы раённай цэнтральнай бальніцы курыруе юрысконсульт Ганна Цітовіч, і за гэты час яна зарэкамендавала сябе граматным і адказным спецыялістам.

Кола яе абавязкаў вельмі шырокае: захоўваць законнасць у дзейнасці ўстановы аховы здароўя, забяспечваць прававую абарону яе інтарэсаў, састаўляць разнастайныя дагаворы, праводзіць дзяржаўныя закупкі. І нават галоўны ўрач не падпіша ніводнага дакумента без узгаднення з юрысконсультам. Таму пасада гэта вельмі адказная.

— Многія лічаць, што такая прафесія складаная і сухая, — кажа Ганна, — але гэта не так. Безумоўна, яна патрабуе асаблівай увагі, карпатлівасці і грунтоўных ведаў у заканадаўстве, умення весці перамовы і тактычна адстойваць свае інтарэсы. Затое колькі задавальнення ў рабоце прыносіць паспяховае вырашэнне праблемы!

Па словах кіраўніцтва ЦРБ, да рашэння штодзённых юрыдычных задач Г. Цітовіч заўсёды падыходзіць з поўнай самааддачай, дэталёва і кампетэнтна. ■

Алена ПЯТУШКА.

Фота аўтара.