Сёлета «Браслаўская звязда» адзначае свой юбілей: ёй спаўняецца 80 гадоў. Столькі часу раёнка крочыць па жыцці разам са сваімі чытачамі. І вельмі прыемна, што ў яе ёсць пастаянныя прыхільнікі, якія не развітваюцца з газетай шмат гадоў. Сярод іх і браслаўчанка Тамара Сакалова.
— Пасля заканчэння Віцебскага педагагічнага інстытута, — узгадвае чытачка, — па размеркаванні прыехала працаваць у браслаўскую школу і адразу выпісала раёнку, каб ведаць навіны краю. Разам з вучнямі чыталі яе на палітінфармацыях.
Зразумела, з часам і дызайн, і змест газеты змяняліся, але заўсёды яна заставалася цікавай і насычанай. З нецярпеннем чакаю кожны свежы нумар і адразу чытаю ад першай старонкі да апошняй. З цікавасцю сачу за дзейнасцю мясцовых улад, напрыклад, рамонтнымі работамі ў горадзе да «Дажынак – 2019». Чытаю і перачытваю аналітычныя артыкулы, звяртаю ўвагу на матэрыялы пра таленавітых людзей раёна, дзейнасць настаўнікаў і школ Браслаўшчыны, дасягненні нашых вучняў, — адзначае суразмоўніца.
— Газета для мяне, — кажа Т. Сакалова, — другое дыханне. На старонках выдання можна знайсці ўсё: праграму, рэкламу, розныя карысныя парады, смачныя рэцэпты страў.
Падабаецца, як падаюць інфармацыю карэспандэнты. Часам здзіўляюся, колькі многа ім трэба ведаць, каб разабрацца ў некаторых аспектах. Словам, «Браслаўская звязда» заўсёды насычана навінамі, што дазваляе трымаць руку на пульсе. Інфармацыя аб’ектыўная і падаецца прафесійна. Так і далей трымаць! ■
Алена ПЯТУШКА.
Фота аўтара.
