У прыцэле яго фотаапарата розныя падзеі: мітуслівае жыццё горада і замалёўкі прыроды, шчаслівыя ўсмешкі маладажонаў і першыя крокі дзетак. Сёння Аляксандр Таўкінь — адзін з найбольш запатрабаваных фатографаў Браслаўшчыны. Яго здымкі вылучаюцца індывідуальнасцю і непаўторным аўтарскім стылем. Напярэдадні Сусветнага дня фатаграфіі ён падзяліўся з «Браслаўскай звяздой» падрабязнасцямі свайго творчага шляху.
— Захапляцца фатаграфіяй я пачаў каля 6 гадоў таму назад. На свой першы фотаапарат збіраў грошы год. І вельмі хутка зразумеў, што проста захапленне пачынае займаць усё больш часу ў маім жыцці, — расказвае малады чалавек. — Напачатку я проста блукаў па вуліцах горада і займаўся вулічнай фотаздымкай. Паралельна самаадукоўваўся, наведваў майстар-класы.
Цяпер у Аляксандра ўжо чацвёрты фотаапарат і некалькі аб’ектываў. Для працы фатографам ёсць усё: неабходная апаратура, час і здольнасці. Сапраўды, калі ў чалавека няма таленту бачыць незвычайнае ў звычайным, выдатнага здымка не будзе, як ні старайся.
Добрую практыку фатаграфавання малады чалавек прайшоў падчас працы ў фотастудыі. Але і цяпер ён імкнецца атрымліваць новыя веды. Неабходна сачыць за тэндэнцыямі ў сваёй справе, лічыць Аляксандр. Для гэтага наведвае семінары з удзелам знакамітых фатографаў з Беларусі, Расіі, Украіны. Выкладае свае фотаздымкі на адпаведныя сайты і абмяркоўвае іх з калегамі. Абмен вопытам значна павышае ўзровень яго як прафесіянала і надае ўпэўненасць.
Некалькі гадоў таму назад Аляксандр Таўкінь пачаў займацца вясельнай фотаздымкай. Прызнаецца, што сябры папрасілі проста паздымаць храналогію падзей на іх вяселлі.
— Пасля першага дня я прыйшоў, лёг на ложак, выцягнуў ногі і падумаў, што больш ніколі ў жыцці не буду фатаграфаваць вяселле, бо гэта складана, — усміхаецца хлопец. — Вясельная фотаздымка спалучае рэпартаж, партрэт, пастановачны кадр і інш. За адзін дзень можна зрабіць да 2 000 здымкаў, і толькі некалькі соцень увойдуць у альбом. Аднак заўсёды прыемна бачыць вынік сваёй работы. Асабліва калі твае здымкі трапляюць у лік лепшых.
Сёння ў маладога чалавека шмат планаў і задумак. І, ведаючы яго творчую натуру, верыцца, што ўсе яны ажыццявяцца.
■ Алена НАБЕЕВА.
Фота аўтара.
