Нейкая незразумелая сіла злучае чалавека з матацыклам, на якім ён з радасцю імчыцца па бязмежных дарогах насустрач ветру і новым уражанням. Нямала заўзятых матацыклістаў і на Браслаўшчыне. Яны рознага ўзросту і прафесій, але ўсіх аб’ядноўвае любоў да «жалезных коней», руху і хуткасці.
З дзяцінства з’явілася зацікаўленасць да двухколай тэхнікі і ў браслаўчаніна Уладзіміра Лапінскага. Разам з бацькам ён з задавальненнем перабіраў дэталі матацыкла, запамінаў асаблівасці яго будовы, вучыўся ўстараняць непаладкі. Спачатку ў падлетка быў мапед, а падчас вучобы ў тэхнікуме бацькі падарылі юнаку першы новы матацыкл. І цяпер мужчына памятае пачуццё шчасця, якое яго ахапіла, калі ён здымаў з падарунка абгортачную паперу. І ўжо ў Лепель на вучобу юнак з гордасцю ездзіў на ўласнай тэхніцы.
Потым была служба ў арміі, уладкаванне на работу, з’яўленне сям’і, таму захапленне на нейкі час давялося «замарозіць». А калі падраслі дзеці, Уладзімір вярнуўся да сваёй мары, тым больш што жонка яго падтрымлівала. І цяпер ён «рассякае» па дарогах на добрым матацыкле.
Трэба адзначыць, што У. Лапінскі стаў адным з ініцыятараў стварэння ў Браславе філіяла Віцебскага абласнога грамадскага аб’яднання «ROAD DOGS МС». І на сённяшні дзень браслаўскае брацтва байкераў налічвае нямала аматараў «жалезных коней». Ёсць у іх і свой клубны дом, дзе яны збіраюцца разам, каб абмеркаваць планы, адрамантаваць матацыклы ці проста пагутарыць.
Хто лічыць, што стаць членам мотаклуба лёгка, а байкеры — бесшабашныя людзі, якія злоўжываюць спіртным, сварацца, парушаюць правілы і рызыкуюць сваім жыццём, вельмі памыляецца.
— Мотаклуб — гэта ў першую чаргу строгая дысцыпліна, — кажа Уладзімір. — І калі адзін зробіць што-небудзь непрыстойнае, то адказнасць ляжа на ўсіх «братоў». Таму выпадковым людзям у нас не месца.
Каб стаць паўнавартасным членам клуба, спачатку трэба заваяваць давер, паказаць, наколькі ты сапраўдны таварыш, надзейны і прыстойны, адказны і годны, праявіць свае чалавечыя якасці і арганізатарскія здольнасці.
А вось тыя, хто ганяе на вар’яцкай хуткасці і ўдзень, і ўначы, падкрэсліў У. Лапінскі, да мотаклубаў ніякага дачынення не маюць, бо сапраўдныя байкеры — адказныя, сур’ёзныя і арганізаваныя.
Несумненна, асаблівую ўвагу мотааматары надаюць сваёй тэхніцы. Напаліраваны да бляску «жалезны конь», у які ўкладаецца столькі сілы, працы і любові, становіцца практычна жывым верным сябрам.
Але не варта думаць, што жыццё членаў клуба складаецца толькі з адных паездак, тусовак і пераборкі сваёй тэхнікі.
— Часта збіраемся сем’ямі, — расказвае Уладзімір, — адзначаем святы, дні нараджэння, падчас якіх праводзім спаборніцтвы, конкурсы. Многія жанчыны разам з мужамі выпраўляюцца ў дальнюю дарогу.
А яшчэ члены клуба «Road Dog’s» — частыя госці ў дзіцячых дамах, інтэрнатах для інвалідаў. Яны прывозяць падарункі, саладосці, але дзецям больш цікава пракаціцца на прыгожай магутнай двухколай тэхніцы.
■ Алена ПЯТУШКА.
Фота аўтара.
По традиции ежегодно накануне 9 мая в соответствии с указом Президента Беларуси Александра Лукашенко выплачивается…
Может ли хрупкая женщина успешно возглавлять секретную службу и наравне с офицерами-мужчинами достойно, говоря уставным…
На неудовлетворительное состояние отдельных улиц микрорайона Муражи города Браслава местные жители обратили внимание еще в…
По всей Беларуси тезисы Всебелорусского народного собрания продолжают оставаться главной темой для обсуждения. Его делегаты…
В эти дни у Евгения Набеева, режиссера народного театра и театра миниатюр «Покер» Браславского РЦК,…
На прошлой неделе в Браславе прошел День призывника. В его рамках повестки получили 20 юношей,…