У параўнанні з папярэднімі гадамі сёлета мароз вельмі рана пачаў скоўваць паверхню вадаёмаў. А першы лёд, хоць яшчэ зусім не трывалы, але прыцягвае да сябе, як вядома, канькабежцаў, рыбаловаў-аматараў і, безумоўна, дзяцей. І тады можа здарыцца бяда.
Неабходна памятаць, што вельмі небяспечна ісці па возеры, рэчцы ці іншым вадаёме, пакуль таўшчыня ледзянога покрыва не дасягне 7 сантыметраў. Да таго ж на адным і тым жа вадаёме вада замярзае нераўнамерна. Ля вусця рэчак, ля крыніц, на плынях і глыбінях лёд нарастае марудна. Нават у моцныя маразы ў такіх месцах могуць быць палонкі.
Перш чым ісці па першым лёдзе, трэба пешняй праверыць яго трыва- ласць. І калі з першага ўдару з’яўляецца вада, лепш адмовіцца ад такой прагулкі. Ні ў якім разе нельга выпрабоўваць трываласць ледзянога покрыва нагой, таму што гэта прамы шлях апынуцца ў сцюдзёнай вадзе.
Рыбаловы-аматары, адпраўляючыся на рыбалку, не павінны забываць прыхапіць з сабой прасцейшыя выратавальныя сродкі — вяроўку, падрыхтаваныя пад “кошку” завостраныя цвікі, зусім не лішняе надзець і камізэльку.
У выпадку правальвання пад лёд нельга панікаваць, неабходна пастарацца абаперціся спінай на край лёду, а нагамі адштурхнуцца ад процілеглага, дапамагаючы сабе “кошкамі”, выбрацца з палонкі і абавязкова клікаць на дапамогу.
Калі хто пачуў такі кліч, трэба, захоўваючы правілы перасцярогі, паспрабаваць неадкладна дапамагчы: захапіць з сабой вяроўку, жэрдку, лесвіцу, што-небудзь іншае, каб можна было здалёк падаць тапельцу выратавальны сродак.
А самае галоўнае — не забываць пра небяспечнасць выхаду на нетрывалы першы лёд, асабліва нагадваць пра гэта дзецям.
■ Віктар МАРХЕЛЬ, старшыня раённай арганізацыі Асвод.