Усе мы спажыўцы і набываем у магазінах розныя тавары. Аднак перш чым яны трапяць да нас у рукі, значную работу правядуць таваразнаўцы. Іх задача — забяспечыць усе нашы перавагі, улічыць розныя густы і прапанаваць самы якасны тавар. Гэта галоўнае і для таваразнаўцы магазіна “Кантынент” ПГУП “СаЛен-сэрвіс” Інгі Міцкевіч.
У сферы гандлю жанчына працуе амаль 6 гадоў. І ўвесь гэты час у краме “Кантынент” на пасадзе таваразнаўцы. Трапіла яна сюды ў 2010 годзе, калі новы магазін толькі пачаў сваю дзейнасць. І хоць стаж працы не такі і вялікі, але можна ўпэўнена сказаць, што жанчына знайшла справу па душы. Пра гэта сведчаць паказчыкі дзейнасці крамы, водгукі пакупнікоў, калектыву і кіраўніцтва.
Спраў у таваразнаўцы хапае. Трэба быць у курсе пераваг пакупнікоў, кантраляваць наяўнасць і паступленне прадукцыі, сачыць за тэрмінамі прыдатнасці, умовамі захавання, афармляць заяўкі пастаўшчыкам. І гэта далёка не ўсё, што павінна паспець зрабіць за дзень жанчына. Аднак, як прызнаецца Інга, калі сваю работу любіш, то яна не здаецца табе складанай.
У зоне абслугоўвання магазіна вялікая тэрыторыя, да таго ж “Кантынент” знаходзіцца на ажыўленай дарозе, што прыводзіць сюды і пакупнікоў, якія жадаюць набыць тавары ў дарогу.
— Завітаўшы да нас, чалавек можа набыць усё неабходнае да стала, — тлумачыць Інга Міцкевіч. — Стараемся абслугоўваць пакупнікоў хутка і якасна. Бо, у рэшце рэшт, канкурэнцыя сярод магазінаў значная, а мы зацікаўлены працаваць так, каб спажыўцы не забывалі дарогу ў “Кантынент”, заўсёды выходзілі ад нас задаволенымі і з пакупкамі.
Кіраўніцтва і калегі Інгі адзначаюць, што яна — сапраўдны прафесіянал. Акуратная ў рабоце, уважлівая да пакупнікоў і падначаленых прадаўцоў, жанчына працуе так, каб у магазіне ўзрасталі аб’ёмы продажу, было менш страт, а якасць гандлю толькі расла.
Не без яе прадпрыемства забяспечвае выкананне ўсіх норм і патрабаванняў у сферы гандлю, не выпадкова, што за сваю дзейнасць і значны ўклад у сацыяльна-эканамічнае развіццё раёна ў сферы гандлёвага абслугоўвання насельніцтва Тнга Міцкевіч атрымала званне “Лепшы па прафесіі”.
Таццяна Пятушка.
Фота аўтара.
