На мінулым тыдні на пасяджэнні прэзідыума райсавета падвялі вынікі арганізацыйна-масавай работы раённага і сельскіх Саветаў дэпутатаў за 2015 год.

Выступаючы з асноўным дакладам, галоўны спецыяліст апарата раённага Савета дэпутатаў Алена Мурашка адзначыла, што галоўная функцыя Савета — спрыяць вырашэнню эканамічных задач, пытанняў жыццезабеспячэння, сацыяльных праблем. Так, за справаздачны перыяд у раёне праведзена 72 сесіі, у тым ліку 12 раённых і 60 сельскіх Саветаў, на якіх было разгледжана 223 пытанні, якія закраналі розныя сферы жыццядзейнасці нашага рэгіёну. Таксама праведзена 16 пасяджэнняў прэзідыума раённага Савета дэпутатаў.

Асаблівае месца ў сваёй рабоце дэпутаты надаюць зваротам грамадзян. У мінулым годзе праведзена 499 прыёмаў, у ходзе якіх паступіла 925 пытанняў, з іх 903 (97,6%) вырашаны станоўча, 12 перададзены для вырашэння ў іншыя інстанцыі, 10 знаходзяцца на кантролі. Разам з тым, адзначыла А. Мурашка, аналіз зваротаў, якія паступілі ў райвыканкам, паказвае, што многія пытанні можна было вырашыць на месцах.

Работа па добраўпарадкаванні населеных пунктаў і навядзенні парадку на зямлі знаходзіцца на пастаянным кантролі дэпутатаў. З пачатку года на гэтыя мэты з бюджэту пярвічнага ўзроўню было накіравана 764,7 млн ​​руб. За справаздачны перыяд адрамантавана і палепшана дарожнае пакрыццё каля 40 км вуліц і дарог, адрамантаваны фасады 11 адміністрацыйных будынкаў, прыведзены ў парадак 51 прыпынак грамадскага транспарту, 18 дзіцячых гульнявых пляцовак, добраўпарадкавана больш за 80 грамадзянскіх могілак, 8 месцаў адпачынку ў лясным фондзе ўздоўж аўтамабільных дарог і 12 — на водных аб’ектах, 19 кантэйнерных пляцовак для збору камунальных адходаў.

У населеных пунктах і ўздоўж аўтамабільных дарог высечана 3600 аварыйных дрэў. Найбольш актыўна гэта работа праводзілася ў Плюскім, Опсаўскім, Слабодкаўскім, Мяжанскім і Цяцеркаўскім сельсаветах. Уздоўж дарог прыбраны хмызнякі, прыведзены ў парадак больш за 150 км кюветаў, каля 70 га зямель ачышчана ад пустазелля і больш за 30 га — ад баршчэўніка Сасноўскага.

Штогод удасканальваецца азеляненне населеных пунктаў з выкарыстаннем элементаў ландшафтнага дызайну. У 2015 годзе пасаджана каля 500 дрэў і 600 дэкаратыўных кустоў, рэканструяваны газоны на плошчы 1,4 га, устаноўлены 62 малыя архітэктурныя формы, устаноўлена і адрамантавана больш за 6 км агароджы.

Вялікую ўвагу сельскія Саветы дэпутатаў надавалі навядзенню парадку на брацкіх магілах. У асноўным на тэрыторыі раёна прыведзены ў парадак усе воінскія пахаванні.

Нямала ўвагі органы мясцовага самакіравання надавалі рэалізацыі ўказа “Аб мерах па ўпарадкаванні ўліку і скарачэнні колькасці пустых і старых дамоў з гаспадарчымі і іншымі пабудовамі ў сельскай мясцовасці”. За мінулы год у раёне знесена 34 старыя дамы. У гэтым плане найбольшую актыўнасць праявілі Відзаўскі, Плюскі і Слабодкаўскі сельсаветы. Маштабная работа па зносе лядашчых будынкаў была разгорнута і ўздоўж Дзяржаўнай мяжы: разабрана 14 і знесена 7 дамоў.

Вялікую ўвагу сельсаветы надаюць выкананню бюджэтаў першаснага ўзроўню. І план паступлення даходаў за мінулы год выкананы ўсімі на 106,1%, у тым ліку Слабодкаўскім — на 117,5%, Плюскім — на 112,4%, Мяжанскім — на 107,3%.

Значная роля ў дзейнасці раённага і сельскіх Саветаў дэпутатаў адводзіцца рабоце з насельніцтвам па месцажыхарстве, асноўным сувязным звяном якой з’яўляюцца органы тэрытарыяльнага грамадскага самакіравання. У сувязі з гэтым сур’ёзна ўзрасла роля старэйшын вёсак, якіх на тэрыторыі нашага раёна 130 чалавек. Гэта людзі з актыўнай жыццёвай пазіцыяй, якія аказваюць неацэнную дапамогу органам улады на месцах у вырашэнні многіх сацыяльных праблем.

Лепшым старэйшынам штоквартальна выплачваюцца матэрыяльныя заахвочванні, на што ў мінулым годзе было прадугледжана  47,9 млн рублёў. Усе выдзеленыя сродкі засвоены.

Старшыня раённага Савета дэпутатаў Ніна Пучынская, падводзячы вынікі дзейнасці раённага і сельскіх Саветаў дэпутатаў, адзначыла, што заканадаўчая і выканаўчая ўлады цесна ўзаемадзейнічаюць у вырашэнні жыццёва важных для раёна задач. І за год зроблена нямала. Тым не менш трэба ўзмацніць работу па рашэнні на месцах актуальных праблем жыццезабеспячэння насельніцтва, спрыяць сельскім жыхарам у развіцці асабістых падсобных гаспадарак, сельсаветам варта надаваць большую ўвагу папаўненню сваіх бюджэтаў, працягваць работу па добраўпарадкаванні тэрыторый.

Алена Пятушка.