Але, на шчасце, ёсць і такія, для каго прызванне і любоў да прафесіі важней за ўсялякі прэстыж. І вельмі прыемна, што такіх маладых спецыялістаў даволі многа сярод педагогаў.
Вось і настаўніца Відзаўскай сярэдняй школы Вольга Патапава не збіраецца зварочваць з абранага шляху.
З дзяцінства дзяўчына, у якой абодва бацькі працуюць на педагагічнай ніве, была знаёма з нялёгкай, патрабуючай поўнай самааддачы, працай настаўніка. Бачыла, што праверка сшыткаў, падрыхтоўка да ўрокаў і пазашкольнай дзейнасці займае ў бацькоў шмат часу. Тым не менш Вольга цвёрда рашыла ісці па іх слядах. Таму пасля заканчэння Дрысвяцкай школы паступіла ў Віцебскі педагагічны ўніверсітэт на матэматычны факультэт.
Пяць гадоў студэнцкага жыцця праляцелі насычана і хутка. Па размеркаванні малады спецыяліст В. Патапава вярнулася на радзіму і была накіравана ў Відзаўскую школу.
Нечакана і няпроста пачалася педагагічная дзейнасць Вольгі Сяргееўны: замест урокаў матэматыкі і фізікі яна акунулася ў складаную работу педагога сацыяльнага.
Не сакрэт, што ступіць на гэты адказны і часам няўдзячны фронт школьнай дзейнасці жадаючых зусім нямнога. Але В. Патапава з маладым імпэтам і адказнасцю ўзялася за ўскладзеныя на яе абавязкі.
— Безумоўна, падчас вучобы, — кажа Вольга Сяргееўна, — уяўляла сабе ўрокі і дапытлівыя вочы вучняў. Выйшла па-іншаму. Але ці варта апускаць рукі пры першых выпрабаваннях.
Не разгубілася настаўніца ў мностве разнастайных дакументаў, і, як адзначыла намеснік дырэктара школы па выхаваўчай рабоце Ганна Баліка, хутка і дасканала ў іх разабралася.
Цяжэй было, прызнаецца сама В. Патапава, наладзіць узаемаадносіны з дзецьмі і асабліва са “складанымі” бацькамі. Прывабную і абаяльную настаўніцу па знешнім выглядзе і росце нават цяжка адрозніць ад старшакласнікаў. Таму аўтарытэт у такім выпадку сярод вучняў заваяваць даволі цяжка. Аднак унутраны стрыжань і цвёрдасць характару, якія адчуваюцца пры размове з педагогам, дапамаглі ёй знайсці з вучнямі кантакт. Да таго ж, як і ў любога сапраўднага выхавацеля дзіцячых душ, у В. Патапавай ёсць свае прафесійныя сакрэты і падыходы да выхаванцаў.
Работа педагога сацыяльнага, я бы сказала, неабдымная і не абмежаваная часам, тым не менш педагог пільна сочыць за сітуацыяй у праблемных сем’ях — праводзіць прафілактычныя гутаркі, некаторых дарослых ушчувае за неахайнасць і абыякавасць да лёсу сваіх дзяцей. А часам бывае так цяжка ды і небяспечна дастукацца да чэрствага сэрца і ўскалыхнуць затуманены алкаголем розум бацькоў.
У гэтым навучальным годзе Вольга Сяргееўна яшчэ працуе і па спецыяльнасці. Грунтоўна і творча падыходзіць настаўніца да падрыхтоўкі сваіх урокаў матэматыкі і фізікі, стараецца растлумачыць і данесці да вучняў цяжкія, незразумелыя тэмы і задачы.
Выхаванне і навучанне дзяцей — складаная, адказная справа, якая патрабуе ад педагога асаблівых якасцей, шырокага кругагляду і пастаяннай самаадукацыі. Далёка не ўсім па сіле вытрымліваць такую разнапланавую нагрузку і стаць настаўнікам з вялікай літары. І вельмі радуе, што на гэты адказны, часам з крутымі паваротамі шлях трывала ступаюць маладыя спецыялісты, як і Вольга Патапава.
Алена Пятушка.
Фота аўтара.
По традиции ежегодно накануне 9 мая в соответствии с указом Президента Беларуси Александра Лукашенко выплачивается…
Может ли хрупкая женщина успешно возглавлять секретную службу и наравне с офицерами-мужчинами достойно, говоря уставным…
На неудовлетворительное состояние отдельных улиц микрорайона Муражи города Браслава местные жители обратили внимание еще в…
По всей Беларуси тезисы Всебелорусского народного собрания продолжают оставаться главной темой для обсуждения. Его делегаты…
В эти дни у Евгения Набеева, режиссера народного театра и театра миниатюр «Покер» Браславского РЦК,…
На прошлой неделе в Браславе прошел День призывника. В его рамках повестки получили 20 юношей,…