Калі мы прыехалі на поле да вёскі Баравыя, там малаціў пшаніцу Сяргей Зелянкевіч на камбайне «New Нolland».
За адзін заезд машына захоплівае 11 метраў пасеваў. Як сказаў камбайнер, з такім агрэгатам можна працаваць толькі на шырокаконтурных палетках, бо на вузкіх участках не развернешся. У гэты дзень ён пачаў жніво ў 11 гадзін, калі колас быў добра абсохлы. Планаваў убіраць зерне да вечара, пакуль не ляжа раса.
Начальнік участка Іван Буян паведаміў, што культура дала нядрэнную ўраджайнасць: узялі прыкладна па 30 цэнтнераў з гектара.
Зерне з поля адразу адвозяць МАЗамі на камбікормавы завод, тут жа за камбайнам ідзе прэс-падборшчык, які прасуе салому ў цюкі. Работа наладжана як след, і за некалькі дзён (пры добрым надвор’і) ураджай з гэтых зямель будзе засыпаны ў сусекі.
Для хлебаробаў Браслаўшчыны ўборка ўраджаю збожжавых і зернебабовых культур — адказная пара. Імі ў раёне занята 16 270 га. Акрамя гэтага, трэба абмалаціць больш за 1 000 га крыжакветных.
Пра тое, з чым падышлі да гэтай важнай кампаніі нашы сельгаспрадпрыемствы, «Браслаўскай звяздзе» расказаў начальнік упраўлення райсельгасхарча Максім Чагарын.
— Максім Аляксандравіч, раскажыце, якія спадзяванні на сёлетні ўраджай хлебнай нівы.
— Калі браць у цэлым, то можна сказаць, што збожжавыя ўрадзілі няблага. Думаю, збяром больш, чым летась. Звычайна на нашых землях лепш родзяць азімыя культуры. І калі восень спрыяе, імкнёмся засеяць максімальныя плошчы. Вось і ў мінулым годзе імі занялі амаль у тры разы больш, чым годам раней. Праўда, сёлета на перыяд наліву коласа прыпала самая спёка і няхватка вільгаці скажацца недаборам часткі ўраджаю. Затое ападкі паспрыяюць большай важкасці каласоў яравых культур.
— Прабачце, але адна справа вырасціць багаты ўраджай, іншая — сабраць і ссыпаць яго ў сусекі. Наколькі гатовыя да ўборкі нашы гаспадаркі?
— Камбайнавы парк раёна налічвае 69 збожжаўборачных агрэгатаў, 6 з якіх пойдуць на спісанне. На малацьбу плануецца адправіць 63 камбайны, 60 % з іх гатовы ў любы дзень прыступіць да жніва. Астатнія яшчэ рамантуюцца. На адвозцы збожжа ў асноўным будуць задзейнічаны МАЗы. Для ўборкі крыжакветных ёсць і 21 прыстаўка, якіх звычайна не хапае. Як і заўсёды, лепшая гатоўнасць у «Маяка Браслаўскага».
Паколькі ў гэтым годзе большасць гаспадарак раёна не справілася з планамі нарыхтоўкі кармоў, гэты працэс на перыяд жніва спыняць не будзем. Створаны 3 міжгаспадарчыя кормаўборачныя атрады, якія будуць працягваць працу на сенажацях. «Слабодка-агра» скааперыруецца з «Аграсэрвісам», «Мяжаны» — з «Друйскім», «Бярозавы край» — з «Відзаўскім». У «Агравідзах», як і ва ўсе папярэднія гады, нарыхтоўкай кармоў будзе займацца свой мехатрад.
Недахоп механізатарскіх кадраў кампенсуецца за кошт гарадскіх арганізацый. Хтосьці сядзе за руль камбайна, нехта заменіць трактарыстаў, занятых нарыхтоўкай кармоў, а тыя адправяцца на ўборку. Ужо заключаны адпаведныя дамовы паміж кіраўнікамі.
— А что скажаце пра гатоўнасць сушыльнай гаспадаркі?
— У раёне 8 дабротных зернесушыльных комплексаў. З іх 3 у «Маяку», па 1 у «Агравідзах», «Бярозавым краі», былой «Новай Гвардыі», «Друйскім» і «Аграсэрвісе». Сваім старэнькім КЗС будуць карыстацца ў «Відзаўскім». «Мяжаны» па меры неабходнасці змогуць дапрацоўваць зерне ў «Друйскім», а «Браслаўскі» — скарыстацца паслугай у райаграсэрвісе. Што датычыць продажу па дзяржзаказе, які нам даведзены ў 2 800 тон, то збожжа, як правіла, хлебапрыёмныя камбінаты прымаюць прама з палёў.
— Максім Аляксандравіч, сёння мы наведваемся (размова адбывалася 12 ліпеня) на палеткі былой «Новай Гвардыі», дзе пачынае ўборку азімай пшаніцы інтэграцыйная структура Глыбоцкага камбікормавага завода. Мы што, перадалі ім свае землі?
— Зусім не так. Ворыўныя плошчы, на якіх займаюцца вырошчваннем збожжа і рапсу, знаходзяцца ў карыстанні ААТ «Бярозавы край». А паколькі гаспадарка ўваходзіць у склад інтэграцыйнай структуры і ўласнымі сіламі не можа апрацаваць іх, то і перадае гэтыя функцыі ўзгаданай арганізацыі. Тая ж карціна і на землях КУСП «Браслаўскі». Таму не трэба ставіць такім чынам пытанне. Бо, згадзіцеся, важна, што зямля дае аддачу, а хто на ёй працуе — справа другасная. Сёлета, напрыклад, на палетках узгаданых гаспадарак інтэграцыйная структура вырошчвае азімыя і яравыя збожжавыя на плошчы 1 300 га і 870 га адпаведна.
— Дзякуй за размову. ■
Вольга ПАТАПОВІЧ.
Фота аўтара.
