Адным з першых у ТЦСАН з’явілася аддзяленне сацыяльнай дапамогі дома. Спачатку яго супрацоўнікі ездзілі па вёсках і хутарах сельсаветаў, каб наведаць адзінокіх і нямоглых старых, гутарылі з імі. І тых, каму была патрэбна дапамога, залічвалі на надомнае абслугоўванне. Сацыяльных работнікаў напачатку было толькі некалькі чалавек.
З кожным годам усё больш бабуль і дзядуляў выказвалі пажаданне, каб пра іх сталасць за памяркоўную плату клапаціліся супрацоўнікі аддзялення сацыяльнай дапамогі дома. І сёння ў іх на абслугоўванні знаходзяцца 603 чалавекі, ды і штат сацыяльных работнікаў павялічыўся да ста сямі.
Узначальвае гэтую патрэбную і неабходную службу загадчык Іна Кроп.
– Галоўная мэта нашай дзейнасці, — кажа Іна, — стварыць для сваіх падапечных усе належныя ўмовы, каб яны маглі як мага даўжэй заставацца ва ўласнай хаце, бо гэта спрыяльна ўздзейнічае на іх здароўе.
Пяць гадоў жанчына працуе ў цэнтры, справу сваю любіць і душой перажывае за яе вынік.
Некалі новага работніка добразычліва сустрэла Ала Калашнікава, якая на той час была загадчыкам гэтага аддзялення. Менавіта яна ўводзіла ў курс спраў, дапамагала разабрацца з дакументацыяй.
І сёння ўжо Іна Вацлаваўна разам са сваім вялікім калектывам заўсёды гатова хутка і якасна арганізаваць дапамогу тым, хто мае ў ёй патрэбу.
Дзейнасць сацыяльнай службы патрабуе ад яе супрацоўнікаў шмат такту, цярпення і міласэрнасці. Камунікабельная, добразычлівая І. Кроп заўсёды ўважліва выслухае кожнага свайго «падшэфнага», знойдзе для яго патрэбныя словы суцяшэння, патлумачыць незразумелае.
Значную работу загадчык аддзялення праводзіць і з сацработнікамі. Для іх пастаянна ладзяцца лекцыі, семінары, навучальныя заняткі, арганізуюцца сустрэчы са спецыялістамі і супрацоўнікамі розных службаў раёна.
Нямала ўвагі, адзначае субяседніца, яны надзяляюць таму, каб аблегчыць часам доўгую дарогу сацработнікам да падапечных. Так, у мінулым годзе цэнтр набыў пяць веласіпедаў і спецаддзенне.
Шмат добрых слоў адрасавала загадчык аддзялення сваім падначаленым. З гонарам расказала, што яны займаюць актыўную жыццёвую і грамадзянскую пазіцыю. Двое з іх з’яўляюцца дэпутатамі мясцовых Саветаў, сем чалавек — старэйшынамі вёсак.
Ды і сама дзейная і энергічная Іна Кроп яшчэ выконвае абавязкі прафсаюзнага лідара сваёй установы. У дадатак жанчына, маючы творчую натуру і мастацкі густ, ахвотна займаецца добраўпарадкаваннем.
Так штодзень руплівая Іна Кроп сваёй дзейнасцю прыносіць карысць адзінокім і нямоглым людзям і ўсяляе ў іх сэрцы іскрынку радасці. ■
Алена ПЯТУШКА.
Фота аўтара.
