Беларусь і Кіраўская вобласць Расіі маюць намер падвоіць тавараабарот. Пра гэта Прэзідэнт Беларусі Аляксандр Лукашэнка заявіў 19 студзеня на сустрэчы з губернатарам Кіраўскай вобласці Аляксандрам Сакаловым.
«Што датычыцца эканомікі, усё ж такі тавараабарот у нас не вельмі вялікі. Ёсць суб’ектыўнага характару прычыны, аб’ектыўныя – гэта зразумела. Недзе $110 млн (за студзень – лістапад 2025 года тавараабарот склаў $108 млн. – Заўвага БелТА). Але тэмпы добрыя. Калі мы такімі тэмпамі будзем развівацца, то мы падвоіць – а гэта наша мэта – тавараабарот зможам», – сказаў кіраўнік дзяржавы.
Ён адзначыў гатоўнасць беларускага боку азнаёміць расійскую дэлегацыю з узорамі тавараў і тэхнікі непасрэдна на вытворчасці. «Калі ёсць жаданне, паглядзіце ўзоры і на Мінскім аўтазаводзе, на «Белкамунмашы» (пасажырская тэхніка ў нас нядрэнная), прытым на розных відах паліва, электробусы. Паглядзіце, калі вам падыходзіць, мы гатовы супрацоўнічаць», – сказаў Прэзідэнт. Больш за тое, Аляксандр Лукашэнка заявіў пра гатоўнасць беларускага боку дапамагчы расійскім рэгіёнам з фінансавымі інструментамі ў пытаннях пастаўкі айчыннай тэхнікі.
Адзін з традыцыйных напрамкаў супрацоўніцтва з расійскімі рэгіёнамі – пастаўкі беларускіх ліфтаў, у тым ліку замена ўстарэлых савецкіх узораў.
У якасці цікавага напрамку для ўзаемадзеяння кіраўнік дзяржавы назваў перапрацоўку торфу. Непачаты край работы ў абодвух бакоў і ў супрацоўніцтве ў галіне сельскай гаспадаркі, лічыць Прэзідэнт.
У сваю чаргу губернатар Кіраўскай вобласці Расіі Аляксандр Сакалоў заявіў пра настроенасць на супрацоўніцтва, прычым не столькі за кошт простага гандлю, а пераважна на аснове стварэння сумесных праектаў. ■
Паводле матэрыялаў БелТА.
