Прэзідэнт Беларусі Аляксандр Лукашэнка 29 кастрычніка заслухаў даклады старшыні праўлення Нацыянальнага банка Рамана Галоўчанкі і старшыні Прэзідыума Нацыянальнай акадэміі навук Уладзіміра Караніка.
Цэнтральнай тэмай даклада кіраўніка Нацбанка стала дапрацоўка праграмы сацыяльна-эканамічнага развіцця Беларусі да 2030 года. Гэтым займаецца рабочая група пад кіраўніцтвам Рамана Галоўчанкі, да 1 лістапада дапрацаваны дакумент павінен быць прадстаўлены Прэзідэнту. Кіраўніку дзяржавы даложана пра асноўны змест праграмы, ключавыя галіны і сферы, на якіх зроблены акцэнт. У канчатковым выглядзе дакумент плануецца вынесці на зацвярджэнне Усебеларускага народнага сходу, пасяджэнне якога пройдзе 18 і 19 снежня бягучага года. Яшчэ адной тэмай даклада Рамана Галоўчанкі стала работа па практычнай рэалізацыі даручэнняў, дадзеных на праведзенай у сярэдзіне верасня нарадзе Прэзідэнта з апаратам Нацыянальнага банка і кіраўніцтвам банкаў. У прыватнасці, рэалізацыя задачы па большай уцягнутасці банкаўскай сістэмы ў эканамічнае развіццё краіны. Гэта і рэсурсная база, і пытанні інфляцыі.
Кіраўнік Нацбанка таксама далажыў пра выпрацаваныя рашэнні па праблемных пытаннях, якія ўваходзяць у кампетэнцыю Нацбанка. У прыватнасці, па маючых грамадскі рэзананс тэмах і зваротах, што паступаюць ад беларусаў.
Старшыня Прэзідыума Нацыянальнай акадэміі навук Уладзімір Каранік далажыў пра ход падрыхтоўкі сустрэчы Прэзідэнта з навуковай грамадскасцю. Было падкрэслена, што навуковая сфера ў тым ліку павінна ўнесці свой значны ўклад у рэалізацыю задач па развіцці краіны ў будучай пяцігодцы. Акцэнт – на практыка-арыентаваныя распрацоўкі, узмацненне сувязі навукі і вытворчасці, імпартазамяшчэнне і нарошчванне экспартнага патэнцыялу, асваенне запатрабаваных у рэальным сектары інавацыйных напрамкаў. ■
Паводле матэрыялаў БелТА.
