Кіраўнік дзяржавы Аляксандр Лукашэнка гатовы асабіста курыраваць здымку фільмаў пра гісторыю Беларусі, але патрэбны добры сцэнарый. Пра гэта ён заявіў на сустрэчы з ідэалагічным актывам, гістарычнай і экспертнай супольнасцю, прысвечанай Дню народнага адзінства.
Старшыня Беларускага камітэта маладзёжных арганізацый Вадзім Баравік узняў тэму папулярызацыі гісторыі Беларусі. Ён адзначыў, што цяпер у краіне ў многім сканцэнтраваны толькі на пэўных, хоць і важных, этапах гісторыі, як, напрыклад, гады Вялікай Айчыннай вайны ці аб’яднанне краіны ў верасні 1939 года. «Але ў нас гісторыя 1000-гадовая. Нашаму «Беларусьфільму» задача павінна быць – зняць добрыя фільмы па ўсёй гісторыі беларускай дзяржаўнасці, яе развіцця, – сказаў ён. – Каб не гаварылі, што ў нас гісторыя пачалася 30 гадоў таму, альбо са стварэннем СССР, альбо з аб’яднання ў 1939 годзе».
«Я гатовы да таго, каб гэта адлюстраваць у кінафільмах. Каб паказаць сваю гісторыю. Я гэтага прыхільнік, – адказаў на гэту прапанову Аляксандр Лукашэнка. – Давайце сцэнарый! Патрэбны добры сцэнарый, каб гісторыя была захавана. Справа нават не ў грашах. Галоўнае – дайце сцэнарый добры. Патрэбны патрыятычны, шчыры, сумленны сцэнарый».
Дэпутат Ігар Марзалюк у сувязі з гэтым далажыў, што такая работа пачата ўжо сумесна з Белтэлерадыёкампаніяй.
«Дайце сцэнарый. Я гатовы курыраваць гэта. І будзем паціху здымаць і рухацца ў гэтым напрамку», – яшчэ раз падкрэсліў Прэзідэнт.
Ён таксама нагадаў, што ў аналагічных мэтах цяпер у Мінску ідзе будаўніцтва новага будынка Нацыянальнага гістарычнага музея.
«Мы хочам актуалізаваць гэту тэму. Хочам стварыць музей, куды б моладзь заходзіла і ганарылася», – сказаў Аляксандр Лукашэнка. ■
Паводле матэрыялаў БелТА.
