На мінулым тыдні прайшла ХХХІХ справаздачна-выбарная канферэнцыя раённай арганізацыі грамадскага аб’- яднання «Беларускі рэспубліканскі саюз моладзі».
Па стане на 1 жніўня членамі БРСМ у нашым раёне з’яўляюцца 807 чалавек, зарэгістравана 34 пярвічныя арганізацыі. За справаздачны перыяд у іх рады ўступілі 574 чалавекі. Уступны ўзнос складае 8,40 рубля, перыядычны для школьнікаў – 4,20 рубля, для моладзі, якая працуе ў сельскай мясцовасці, – 10,50 руб., для працуючай моладзі ў гарадской мясцовасці – 14,70 руб. Сабраныя грошы накіроўваюцца на арганізацыю і правядзенне мерапрыемстваў у раёне.
Асноўнымі напрамкамі дзейнасці БРСМ з’яўляюцца грамадзянска-патрыятычнае выхаванне, студатрадаўскі і валанцёрскі рух, культурна-забаўляльная дзейнасць, здаровы лад жыцця, падтрымка адоранай і таленавітай моладзі, прававое выхаванне, работа ў інтэрнэт-прасторы і са сродкамі масавай інфармацыі, развіццё маладзёжных атрадаў правапарадку.
На Браслаўшчыне паспяхова рэалізуюцца такія праекты БРСМ, як «Роднае-народнае», «У школу з Добрым Сэрцам», «Цуды на Каляды», «Падзяліся цяплом душы сваёй», «Прыбяром снег разам» і інш. Актывісты раённай арганізацыі ўдзельнічалі ў трох выбарчых кампаніях. Яны збіралі подпісы, працавалі ва ўчастковых камісіях, былі назіральнікамі на ўчастках для галасавання, праводзілі экзіт-полы.
За справаздачны перыяд у Браслаўскім раёне склалася пэўная сістэма работы па арганізацыі занятасці моладзі. З 2021 года па 2025-ы ў розных арганізацыях працавалі 20 студэнцкіх атрадаў агульнай колькасцю 105 чалавек.
Вялікую ўвагу райкам удзяляе папулярызацыі здаровага ладу жыцця. Сумесна з РСФК «Дрывяціч» і аддзелам райвыканкама па адукацыі праводзіцца значная работа па арганізацыі фізкультурна-аздараўленчай працы з насельніцтвам. Найбольш папулярнымі відамі спорту ў раёне як у навучэнскай, так і ў працоўнай моладзі з’яўляюцца валейбол і футбол, настольны тэніс. Прадстаўнікі Браслаўшчыны рэгулярна прымаюць удзел у абласным турыстычным злёце працоўнай моладзі, беларуска-расійскім адукацыйна-патрыятычным лагеры «Курган Дружбы» ў Верхнядзвінскім раёне.
Як адзначыла начальнік аддзела ідэалагічнай работы і па справах моладзі райвыканкама Наталля Спірыдонава, БРСМ з’яўляецца лакаматывам сярод моладзі. «Раённы камітэт шмат робіць па арганізацыі вольнага часу школьнікаў, студэнтаў, маладых спецыялістаў. Праводзяцца цікавыя і яркія мерапрыемствы, акцыі, ёсць магчымасці для самарэалізацыі. Галоўнае – іх выкарыстоўваць і дзейнічаць на карысць грамадству і краіне», – адзначыла яна.
Дэлегаты канферэнцыі прызналі работу раённай арганізацыі за справаздачны перыяд здавальняючай, абралі склад раённага камітэта ГА БРСМ і раённай кантрольнай камісіі, прынялі зварот да моладзі раёна, вылучылі прадстаўнікоў на абласную канферэнцыю. ■
Алена НАБЕЕВА. Фота аўтара.
