Беларусь мае намер развіваць супрацоўніцтва з Манголіяй па шырокім спектры напрамкаў. Пра гэта Прэзідэнт Беларусі Аляксандр Лукашэнка заявіў па выніках афіцыйных перагавораў ва Улан-Батары.
«Сёння мы вызначылі стратэгічныя напрамкі двухбаковага супрацоўніцтва. І не толькі стратэгічныя. Прадметна абмеркавалі канкрэтныя эканамічныя і кааперацыйныя праекты. Я ўчора і сёння гаварыў вам пра тое, што нам бы мець хаця б тры канкрэтныя праекты для развіцця. Аднак дакументы, якія мы сёння падпісалі, сведчаць пра тое, што гэта ўжо значна больш, чым тры праекты», – сказаў беларускі лідар.
Бакі дамовіліся пра пастаўкі беларускай тэхнікі для горназдабываючай прамысловасці, сельгастэхнікі і абсталявання, машын для ліквідацыі надзвычайных сітуацый. Размова ідзе і пра магчымасці навучання мангольскіх грамадзян рабоце з гэтай тэхнікай, а таксама павелічэнне колькасці мангольскіх студэнтаў у Беларусі.
Прэзідэнт Беларусі таксама выказаўся за стварэнне на тэрыторыі Манголіі сумесных зборачных прадпрыемстваў, у тым ліку трактароў, аўтамабіляў, ліфтаў, кар’ерных самазвалаў. І на гэтых прадпрыемствах ужо вучыць мангольскую моладзь.
Акрамя эканомікі, размова на перагаворах таксама ішла пра супрацоўніцтва ў сферах навукі і адукацыі, прыродаахоўнай дзейнасці, культуры, СМІ, спорту, турызму. Ёсць агульны інтарэс да ўзаемадзеяння ў галіне бяспекі, праваахоўнай дзейнасці, ліквідацыі надзвычайных сітуацый. «Асабліва што датычыцца бяспекі і абароны вашай краіны. Вы валодаеце незлічонымі багаццямі. У вас у зямлі ёсць усё, нават тое, пра што вы яшчэ толькі здагадваецеся. І вы што, думаеце, вам дадуць спакойна жыць? Таму гэта трэба ўмець абараніць. Мы гатовы вам падставіць плячо. Закрытых тэм у супрацоўніцтве з вамі няма і ніколі не будзе. Вы – нашы блізкія людзі», – дадаў Аляксандр Лукашэнка.
«Мы не за выгадай прыехалі. Мы хочам аднавіць нашы адносіны, якія заўсёды былі не сяброўскімі, а братэрскімі. Вось аснова нашага візіту!» – падкрэсліў Прэзідэнт Беларусі. ■
Паводле матэрыялаў БелТА.
