Завяршыўся дзяржаўны візіт Аляксандра Лукашэнкі ў Кітайскую Народную Рэспубліку. У яго рамках дасягнуты цэлы шэраг узаемавыгадных міжнародных дамоўленасцей.

Так, у рамках трохдзённага візіту беларускага лідара ў Кітай адбыліся афіцыйныя перамовы кіраўніка нашай дзяржавы са Старшынёй КНР і вышэйшымі службовымі асобамі гэтай краіны. Абмеркаваны шырокі комплекс пытанняў далейшага развіцця супрацоўніцтва, напаўненне практычным зместам новага ўзроўню беларуска-кітайскіх адносін.

Аляксандр Лукашэнка і Сі Цзіньпін прынялі сумесную заяву аб далейшым развіцці ўзорных адносін і ўсебаковага стратэгічнага партнёрства Беларусі і КНР у новую эпоху.

Што тычыцца эканамічнага боку пытання, то Беларусь і Кітай у ходзе дзяржвізіту заключылі амаль чатыры дзясяткі пагадненняў і кантрактаў на агульную суму $3,5 млрд.

Падпісана 27 міжурадавых, міжведамасных і міжрэгіянальных пагадненняў, восем камерцыйных кантрактаў у розных галінах – прамысловай і сельскагаспадарчай дзейнасці. І спецыялісты адзначаюць, што гэта яшчэ не мяжа, таму што праца працягваецца. Беларускі бок разлічвае, што гэты пакет будзе павялічаны.

Двухбаковыя дакументы пры гэтым датычацца развіцця супрацоўніцтва ў самых розных сферах, уключаючы інвестыцыі, сельскую гаспадарку, пастаўкі харчавання, ахову здароўя, будаўніцтва, прамысловасць, навукова-тэхнічнае супрацоўніцтва, спорт, турызм і медыя.

Акрамя таго, вялікі блок падпісаных дакументаў у рамках дзяржвізіту Аляксандра Лукашэнкі ў Кітай датычыцца міжрэгіянальнага супрацоўніцтва, фінансаў, банкаўскай сферы, інфармацыйнага забеспячэння гандлю і супрацоўніцтва па лініі арганізацыі Чырвонага Крыжа. ■

Па матэрыялах БелТА