Вызначылася яна за гэты час і з асноўным педагагічным прынцыпам: весці заняткі так, каб бачыць агеньчыкі дапытлівасці ў вачах навучэнцаў, іх жывую непадробную цікавасць, жаданне паказаць свае ўменні і навыкі. Што ж яшчэ трэба настаўніцы, якая ў прафесію прыйшла асэнсавана, прадоўжыўшы працоўную дынастыю: яе маці выкладала беларускую мову, работа бацькі таксама была звязана з дзецьмі. Пасля заканчэння Віцебскага дзяржаўнага ўніверсітэта імя П. М. Машэрава ўраджэнка Міёршчыны па размеркаванні трапіла ў Браслаў, дзе ёй адразу прапанавалі работу ў гімназіі. У гэтай установе адукацыі А. Сіўко і працуе з 1998 года.
Сваю дзейнасць яна будуе на аснове пераканання, што педагог павінен тварыць і ніколі не спыняцца на дасягнутым. А калі ў яго самога ёсць зацікаўленасць, то абавязкова атрымаецца прывіць інтарэс да справы і дзецям. Дасягненні гімназістаў – знаўцаў беларускай мовы і літаратуры, у прыватнасці, неаднаразовы паспяховы ўдзел у этапах алімпіяды ў раёне, вобласці і на рэспубліканскім узроўні, – пацвярджаюць, што гэта сапраўды так.
– Мне цікавы сам працэс зносін з дзецьмі. Прыемна бачыць, як яны захапляюцца прадметам, як гараць іх вочы – хочацца даць ім больш. Не толькі на ўроках, але і ў пазакласнай дзейнасці я імкнуся заахвоціць навучэнцаў да ўдзелу ў розных конкурсах, даследаваннях, да стварэння і рэалізацыі праектаў. Такія віды работы даюць магчымасць для самавыражэння і развіцця дзяцей, – дзеліцца педагагічнымі сакрэтамі Аксана Уладзіміраўна. – Каб захапіць вучня, трэба ўбачыць яго інтарэсы, дапамагчы з іх вызначэннем і спрыяць працэсу росту дзіцяці. Заахвочваць да працы праз цікавыя факты, больш шырокую інфармацыю.
Таму выхаванцы А. Сіўко і дэманструюць не толькі выдатныя веды на тэарэтычных іспытах, а і добрыя вынікі на навукова-практычных канферэнцыях ды ў творчых конкурсах. Гэты ж навучальны год выдаўся асабліва «ўраджайным» на дасягненні: падчас абласнога этапа галоўнага інтэлектуальнага спаборніцтва краіны навучэнка 11-га класа Ганна Бялусь была адзначана дыпломам ІІІ ступені, а яе аднакласніца Ангеліна Варанецкая атрымала дыплом ІІ ступені і рыхтуецца прадставіць Браслаўскі раён у рэспубліцы.
Безумоўна, гэтаму папярэднічала вялікая сумесная работа дапытлівых дзяўчат і іх настаўніцы беларускай мовы і літаратуры. Яна, дарэчы, шмат увагі ўдзяляе прафесійнаму самаўдасканаленню – знаходзіцца ў пастаянным пошуку інфармацыі і высвятленні складаных пытанняў. Пры працы з дзецьмі, упэўнена Аксана Сіўко, трэба выкладацца на ўсе 100 %, верыць у поспех за дваіх – за сябе і за вучня, а яшчэ мець прафесійную кампетэнтнасць і быць сучасным, у тым ліку валодаць электроннымі сродкамі навучання. Усё гэта патрабуе шмат часу, таму, каб якасна рабіць сваю справу, даводзіцца чымсьці ў жыцці ахвяраваць. Так, са шкадаваннем адзначае педагог, нават кнігі яна чытае выключна метадычныя або праграмныя.
Аксана Уладзіміраўна ахвотна дзеліцца сваімі творчымі задумкамі і практычнымі знаходкамі: яна праводзіла майстар-класы, адкрытыя ўрокі для калег з раёна, вобласці, прадстаўляла напрацаваны вопыт у Пскове, публікавала матэрыялы на старонках часопісаў «Народная асвета», «Кіраванне ў адукацыі». Не дзіўна, што дзейнасць А. Сіўко адзначана ўзнагародамі рознага ўзроўню, сярод якіх маюцца і граматы Міністэрства адукацыі. ■
На этой черно-белой фотографии запечатлен момент присяги браславчанки Ирины Корвель, которая отправилась в командировку в…
«Не бяруся за справу, якую не магу зрабіць, не люблю інтрыг, валодаю неўтаймоўным аптымізмам, люблю…
Уже несколько лет кряду браславчан волнует качество воды, которая течет из кранов в их домах…
В Витебской области 27 апреля будет дан старт региональному этапу чемпионата Республики Беларусь по футболу…
Концепция национальной безопасности и Военная доктрина Республики Беларусь, которые были утверждены на заседании VII Всебелорусского народного собрания, официально…
Совсем недавно белорусский парламент принял поправки в законы по национальной безопасности. Одно из главных новшеств…