Першыя крокі ў прафесію заўсёды няпростыя. Педагогу, напрыклад, трэба заваяваць аўтарытэт у вучняў, разгледзець здольнасці і асаблівасці кожнага, зацікавіць сваім прадметам. Гэта патрабуе шмат намаганняў, часу і абавязкова жадання працаваць з дзецьмі.

Паліна Юдзевіч, настаўнік фізічнай культуры, прыйшла ў Ахрэмаўскую школу пасля заканчэння Полацкага дзяржаўнага ўніверсітэта па мэтавым накіраванні. А гэта значыць, што як мінімум пяць гадоў дзяўчыне не прыйдзецца мяняць свае жыццёвыя планы. — Сама я з Браслава, таму з радасцю вярнулася дадому, — кажа Паліна. — У свой час скарысталася мэтавым накіраваннем пры паступленні ў ВНУ, добра разумеючы, што ў мяне будзе гарантаванае рабочае месца.

Са спортам, да якога яе падштурхнуў прыклад бацькі і старэйшай сястры, дзяўчына пасябравала яшчэ ў дзяцінстве. У школьныя гады яна сур’ёзна займалася лёгкай атлетыкай, былі і значныя дасягненні ў спаборніцтвах рознага ўзроўню. Таму пытанне пра выбар прафесіі не ўзнікала.

Зразумела, перад першымі ўрокамі былі хваляванні, але вера ў свае сілы, любоў да спорту і дзяцей дапамаглі маладому педагогу ўпэўнена правесці заняткі.

У калегі Паліны Анастасіі Скрабоўскай, настаўніцы гісторыі, таксама нямала клопатаў. У першую чаргу трэба падрыхтаваць цікавы ўрок. А для гэтага даводзіцца чытаць шмат дадатковага матэрыялу, шукаць цікавыя гістарычныя факты, выкарыстоўваць разнастайныя тэхнічныя сродкі.

— Яшчэ, здаецца, сама зусім нядаўна вучылася ў гэтай жа школе, — адзначае Анастасія. — І вось мае настаўнікі сталі калегамі. З аднога боку, у такім выпадку лягчэй адаптавацца, з іншага — больш адказнасці.

На выбар прафесіі А. Скрабоўскай паўплывала настаўніца гісторыі Марыя Лашкова. Яе цікавасць да гістарычных таямніц перадалася і дзяўчыне. І вось пасля заканчэння Полацкага дзяржаўнага ўніверсітэта яна ўжо сама дзеліцца сваімі ведамі з вучнямі.

Безумоўна, першы год працы ў маладых спецыялістаў напружаны і складаны, але, галоўнае, што дзяўчаты ніколькі не расчараваліся ў сваім прафесійным выбары. Радуе і той факт, што яны вярнуліся на сваю малую радзіму. ■

Алена ПЯТУШКА.

Фота аўтара.