Добра, калі ў калектыве ёсць чалавек, які і сваю работу выконвае як след, і ніколі не адмовіць у дапамозе тым, каму яна патрэбна. Увогуле працы не баіцца і не «спіхвае» яе на іншых. Такі чалавек шчыруе жывёлаводам на МТФ «Трэйбшуны» ў ААТ «Агравідзы». Шмат добрых слоў пра Уладзіміра Платашына давялося пачуць яшчэ да знаёмства з ім.

— Працаваць побач з такім мужчынам-гаспадаром — задавальненне, — расказвала мне загадчыца фермы Тэрэза Грыкін. — Уладзімір тут ужо больш за 30 год, і яго калегі не ўяўляюць, як бы змаглі справіцца з усімі ўзнікаючымі ў ходзе работы складанасцямі без гэтага чалавека. У яго да любой справы свой асабісты падыход — гаспадарскі.

На ферме У. Платашын працуе жывёлаводам, але часта выконвае іншыя работы. Калі, напрыклад, раптам зламаецца водаправод ці кармушка ў каровы, ён не чакае, што нехта прыедзе і адрамантуе, і нават што яго папросяць дапамагчы. Проста бачыць няспраўнасці і выпраўляе іх.

Сам мужчына рады быць карысным і дапамагае з ахвотай. Лічыць, што калі ёсць час і жаданне зрабіць тую ці іншую справу, то дастаткова прыкласці крыху намаганняў — і ўсё атрымаецца. Галоўнае тут — не ленавацца.

Дарэчы, каля дома Уладзіміра таксама заўсёды парадак. Інакш ён і не ўмее. ■

Вольга ПАТАПОВІЧ.

Фота аўтара.