На раніцу 18 чэрвеня пад касу лягло 39,9 % гэтых плошчаў, а на тую ж мінулагоднюю дату — 83,1 %.

Каб травы першага ўкосу не страцілі сваіх спажыўных якасцей, сельгаспрадпрыемства плануе завяршыць іх уборку, як і ў мінулым сезоне, да 3 ліпеня.

— Для гэтага ў гаспадарцы дастаткова надзейнай тэхнікі і спрактыкаваных механізатараў, — упэўнена сцвярджае начальнік першага аддзялення сельгаспрадпрыемства Валерый Ваштаевіч.

Леанід Дубіна — адзін з тых надзейных працаўнікоў сельскагаспадарчага кааператыва, чый уклад у агульную справу правераны часам. Чацвёрты год ідзе, як ён атрымлівае заслужаную пенсію, але па-ранейшаму ўпэўнена кіруе трактарам: у зімовастойлавы перыяд на «Гаспадары» корміць буйную рагатую жывёлу на фермах першага аддзялення, а летам прычапляе за «Беларусам» прэс-падборшчык. Яго працавітасці і ўмельству можна толькі па-добраму пазайздросціць. Летась ён увесь корманарыхтоўчы сезон трывала трымаўся ў тройцы лідараў раённага спаборніцтва на нарыхтоўцы сена. І сёлета пакуль што зарулоніў яго найбольш — 241 тону па стане на 18 чэрвеня.

Па словах В. Ваштаевіча, тэхнікі, задзейнічанай на корманарыхтоўцы, менш не стала і распачалі яе, як звычайна. Але тэмпы не нарошчвалі спецыяльна, бо дэфіцыт вясновых ападкаў стрымаў развіццё траў да патрэбнай фазы. Такі гаспадарчы падыход апраўдвае сябе. Хоць траў пакуль што скошана намнога менш, але ўраджай зялёнай масы добры. У прыватнасці, назапашана травяных кармоў на зімовастойлавы перыяд 6,52 ц к. адз. на ўмоўную галаву жывёлы (летась на тую ж дату — 5,25 ц к. адз.), у тым ліку 4 367 тон сенажу (3 001 т) і 492 т сена (684 т). ■

Казімір ПЯТУШКА.

Фота аўтара.