Першае мерапрыемства маладога спецыяліста, рэжысёра Браслаўскага РЦК Карыны Пуйша адбылося на сцэне ўстановы. Спектакль для дзяцей «Царэўна Сунічка» стаў яе дэбютам і, трэба адзначыць, паспяховым.
Дзяўчына прыйшла ў РЦК пасля заканчэння Віцебскага каледжа мастацтваў: атрымала спецыяльнасць рэжысёра народных абрадаў і свят і вярнулася працаваць у родны горад. Ужо праз паўгода Карына дэбютавала ў ролі рэжысёра першага самастойнага спектакля. У ім узялі ўдзел культработнікі і выхаванцы тэатральнага гуртка «На біс». Усе акцёры выдатна справіліся са сваімі ролямі, а сам спектакль атрымаўся лёгкім, смешным і добрым. Яго адметнасцю стала інтэрактыўнасць: удзельнікі падтрымлівалі кантакт з маленькімі гледачамі, спявалі і танцавалі разам з імі. Варта адзначыць, што пастаноўка аўтарская. Сцэнарый К. Пуйша напісала разам са сваёй аднагрупніцай яшчэ падчас вучобы ў каледжы.
Як прызналася пасля прэм’еры Карына, яна вельмі хвалявалася перад сваім дэбютам і асабліва чакала рэакцыі гледачоў. Аднак па іх апладысментах было зразумела, што ўсё спадабалася, а значыць, прэм’ера прайшла добра! ■
Алена НАБЕЕВА.