На апошнім пасяджэнні райвыканкама, акрамя сельскагаспадарчай, абмяркоўвалася і тэма будаўніцтва на Браслаўшчыне.

Па словах намесніка старшыні райвыканкама Міхаіла Пліско, будаўніцтва жылля каторы год запар застаецца перспектыўным у нашым раёне. Так, за мінулых 5 гадоў на Браслаўшчыне ўзведзена больш за 50 тысяч м² жылля, прычым 41 340 м² складае індывідуальнае жыллёвае будаўніцтва.

Леташняе заданне па будаўніцтве жылля наш раён выканаў на 100 % і здаў ў эксплуатацыю 3 019 м² у доме долевага будаўніцтва і 7 001 м² індывідуальнага жылля.

Заданне на гэты год — 10 500 м² . За паўгоддзе асвоена прыкладна 35 %. Даведзеныя паказчыкі плануецца выканаць за кошт уводу 7 500 м² індывідуальных дамоў і здачы ў чацвёртым квартале 60-кватэрнага дома долевага будаўніцтва.

Увогуле браслаўскія будаўнікі задзейнічаны на розных аб’ектах. Акрамя будоўлі шматкватэрнага дома, яны вядуць капітальны рамонт сярэдняй школы № 2, дзіцячага сада № 3, вуліцы Юбілейнай, таксама дапамагалі ўзводзіць Мёрскую бальніцу. ■

Вера БУЛАНАВА.

Фота аўтара.