На гэтым тыдні, калі тэрмометры паказвалі да мінус 20, супрацоўнікі аддзялення ДАІ РАУС працавалі ва ўзмоцненым рэжыме. Патрульныя машыны пастаянна курсіравалі па дарогах раёна ў пошуках тых, хто замярзае ў дарозе. Міліцыянеры абавязкова мелі з сабой валёнкі, тэрмас з гарачым чаем і правады для «прыкурвання».

— Асабліва небяспечна «стаць» на дарозе ноччу, калі машын, вадзіцелі якіх маглі б дапамагчы, становіцца значна менш і калі да бліжэйшага населенага пункта далёка, — кажа Сяргей Капусцін, інспектар ДПС АДАІ РАУС. — Напрыклад, у сераду, у маё дзяжурства, — працягвае расказ інспектар, — каля 8 гадзін вечара на дарозе ля дачнага пасёлка спыніў мужчына, які расказаў, што прыехаў на рыбалку, а калі сабраўся ехаць дамоў, аўтамабіль не завёўся і ў мабільніку, як на зло, батарэйка «села». Аўтааматара адагрэлі гарачым чаем, а таксама «рэанімавалі» яго мікрааўтобус.

Супрацоўнікі ДАІ часта прыходзяць на дапамогу аўтаўладальнікам, але ўсё ж такі настойліва раяць ва ўмовах экстрэмальнага надвор’я адмовіцца ад паездак на асабістым транспарце. ■

Вольга ПАТАПОВІЧ. Фота аўтара.