Сёлета ўнітарнаму прадпрыемству “Браслаўскія азёры” споўнілася 57 гадоў з дня заснавання. Таму турысцка-аздараўленчы комплекс добра вядомы аматарам актыўнага адпачынку і воднага турызму яшчэ з часоў Савецкага Саюза.
Безумоўна, за гэты час прафсаюзная турбаза (як яе называюць мясцовыя жыхары) істотна змяніла свой выгляд: новае аблічча набыў спальны корпус, замест шчытавых домікаў паступова з’яўляюцца сучасныя бунгала і катэджы, абноўлены інтэр’ер сталовай і кафэ. Дагледжаныя газоны, малыя архітэктурныя формы, утульныя альтанкі, дзіцячыя пляцоўкі — усё гэта толькі ўпрыгожвае турбазу. І, як адзначае дырэктар прадпрыемства Іван Бялусь, касметычны рамонт і работы па добраўпарадкаванні працягваюцца.
У летні сезон толькі ў буднія дні тут адпачываюць да 200 чалавек, у выхадныя гэта лічба значна павялічваецца. Шмат прыязджаюць дзяцей, запатрабаваны і сямейны адпачынак. Немалаважным аспектам з’яўляецца і тое, што адпачываючыя затрымліваюцца на даволі доўгі тэрмін, асабліва расіяне. У міжсезонне нумары браніруюць аматары зімняй рыбалкі і спорту, камандзіровачныя, індывідуальныя турысты.
У выхадныя дні ў банкетнай зале мясцовыя жыхары гуляюць вяселлі, адзначаюць юбілеі і іншыя ўрачыстасці.
Сваім адпачываючым адміністрацыя турбазы прапануе цікавыя забаўляльныя праграмы, гульні, конкурсы, дыскатэкі. Кожны, хто працуе ў штаце, стараецца прывабіць турыстаў ветлівасцю, культурай абслугоўвання, забяспечыць ім камфортнае жыццё і разнастайны адпачынак.
— На турбазе адпачываем ужо другі год. Месцы браніравалі загадзя. Адпачынак падабаецца, бо тут для яго створаны ўсе належныя ўмовы: цудоўная прырода і чыстая вада, прапануюць цікавыя экскурсіі і паходы. Мы з задавальненнем наведалі гістарычныя і проста прыгожыя мясціны Браслаўшчыны, хадзілі на байдарках па азёрах. У пахмурнае надвор’е можна пагуляць у тэніс ці більярд. Ды і харчаванне нас задавальняе. Таму на наступны год таксама плануем прыехаць менавіта сюды.
— Пра Браслаўшчыну даведаліся ад сяброўкі. Яе станоўчыя водгукі падштурхнулі нас сюды прыехаць. І вось ужо чацвёрты год запар адпачываем на браслаўскіх азёрах. Раней ездзілі на мора, але некранутасць вашай прыроды, цішыня і спакой падкупілі нас. Паколькі працаваць можам праз інтэрнэт, то жывём на турбазе два, а то і тры месяцы. Падабаецца ўсё: пражыванне, харчаванне, забаўляльныя мерапрыемствы. Сын таксама знаходзіць сабе занятак. У мінулым годзе ў школе ён нават пісаў сачыненне пра адпачынак на Браслаўшчыне. Ходзім у лес у ягады. Важна, што не трэба хвалявацца за бяспеку сына — можна спакойна адпускаць яго ў лес ці на пляж. За гэтыя гады пазнаёміліся з наваколлем, славутасцямі Браслава і бліжэйшых вёсак. У вас вельмі добразычлівыя і гасцінныя людзі.
Да новых беларускіх грошай прывыклі адразу, і цяжкасцей не ўзнікала.
Жадаем мясцовым жыхарам цаніць і берагчы сваю прыроду, а ўсім беларусам — росквіту.
■ Алена ПЯТУШКА. Фота аўтара.
По традиции ежегодно накануне 9 мая в соответствии с указом Президента Беларуси Александра Лукашенко выплачивается…
Может ли хрупкая женщина успешно возглавлять секретную службу и наравне с офицерами-мужчинами достойно, говоря уставным…
На неудовлетворительное состояние отдельных улиц микрорайона Муражи города Браслава местные жители обратили внимание еще в…
По всей Беларуси тезисы Всебелорусского народного собрания продолжают оставаться главной темой для обсуждения. Его делегаты…
В эти дни у Евгения Набеева, режиссера народного театра и театра миниатюр «Покер» Браславского РЦК,…
На прошлой неделе в Браславе прошел День призывника. В его рамках повестки получили 20 юношей,…