Амаль на кожны Новы год ад жыхароў горада даводзілася чуць незадаволеныя каментарыі адносна галоўнай ёлкі. То яна крывая, то лысая, то недастаткова высокая ці кепска ўпрыгожаная, то яшчэ што-небудзь. І вось сёлета гарадскія ўлады здолелі, здаецца, дагадзіць усім. На гарадской плошчы ўстанавілі металічны каркас, на якім з 43 елак пабудавалі навагоднюю красуню.
На набыццё металаканструкцыі вышынёй 14,5 м былі затрачаны сродкі, заробленыя на раённым суботніку, – усяго 77 247 600 рублёў. Работнікі прадпрыемства ЖКГ “Браслаў-камунальнік” на працягу месяца залівалі 14 кубічных метраў бетону пад фундамент, на якім амаль трохтонны каркас змог бы трывала замацавацца.
А каб сфармаваць такую высокую ёлку давялося набыць 13 двухмятровых, 10 – 4,5-мятровых і 20 – 3,5-мятровых елак агульным коштам амаль на 7 мільёнаў рублёў. Сёлета, каб яшчэ больш падкрэсліць прыгажосць навагодняй красуні, на 33 мільёны былі закуплены новыя гірлянды.
Да Новага года застаюцца лічаныя дні, і ў горадзе актыўна вядзецца падрыхтоўка да яго сустрэчы: упрыгожваюцца вуліцы і хаты, а таксама гарадскія прадпрыемствы. Калі надвор’е ўсё ж пераменіцца на сапраўды зімовае, то запланаваныя на святочны перыяд мерапрыемствы парадуюць браслаўчан удвая больш.

Галляш Сялява.