Народны тэатр мініяцюр «Покер» Браслаўскага РЦК адзначаны дыпломам ІІ ступені міжнароднага дыстанцыйнага конкурсу WORLD ART GAMES у Іспаніі.
Гэтае творчае спаборніцтва не мае межаў для ўдзельнікаў, канкурсанты дасылаюць свае работы больш чым з 30 краін, нават журы ў ім інтэрнацыянальнае. Форум праводзіцца па некалькіх намінацыях. Браслаўчане падавалі заяўку ў катэгорыі «Арыгінальны жанр» і набралі 80 балаў са 100 магчымых. Гэта ўжо не першае дасягненне тэатра сёлета.
Дарэчы, «Покеру» споўнілася 16 гадоў з дня заснавання. Напачатку калектыў працаваў у жанры ліцадзеі – ставіў гумарыстычныя замалёўкі на розныя жыццёвыя гісторыі. Паступова «Покер» з раённага ўзроўню выйшаў на абласны. Яго заўважылі на Віцебшчыне, даверылі прадставіць рэгіён на рэспубліканскім фестывалі народнага гумару «Аўцюкі», браслаўчане сталі выступаць і за межамі краіны.
Праз некаторы час бяззменны кіраўнік «Покера» Яўген Набееў вырашыў паспрабаваць новы накірунак дзейнасці – жывыя скульптуры. Упершыню яны былі прэзентаваны падчас міжнароднага фестывалю «Браслаўскія зарніцы» ў 2017 годзе і адразу ўразілі сваёй арыгінальнасцю. З таго часу «белыя», «залатыя», «сярэбраныя», «рознакаляровыя» фігуры пачалі свой творчы шлях.
Цяпер яны частыя госці не толькі сваіх раённых свят, але і мерапрыемстваў рэспубліканскага маштабу. Напрыклад, у гэтым годзе артысты прынялі ўдзел у святкаванні Дня Перамогі ў Мінску, гала-канцэрце «Памяць пакаленняў», рэспубліканскім балі выпускнікоў, дні горада сталіцы, Гродна, 755-годдзі Магілёва, «Славянскім базары» ў Віцебску, урачыстасцях з нагоды 20-годдзя БРСМ, фінале дабрачыннай акцыі «Аднаўленне святынь Беларусі» і інш.
У склад калектыву ўваходзяць браслаўчане, якія працуюць у розных арганізацыях горада, школьнікі. З ахвотай падтрымліваюць ідэі «Покера» і культработнікі, і кіраўніцтва РЦК. Побач з рэжысёрам працуе мастак Марына Рачынская – дапамагае ўвасабляць мастацкія задумкі.
Адна з апошніх навінак калектыву – перформансы з удзелам амаль двухметровых робатаў-трансформераў. Герой легендарнага кінафільма пра робатаў Бамблбі ўжо стаў любімцам публікі. З яго ўдзелам калектыў нават распрацаваў інтэрактыўную праграму для дзяцей.
Чарговая ж узнагарода «Покера» не толькі папоўніла шэраг дасягненняў калектыву, але і стала стымулам не спыняцца на дасягнутым і ісці да пакарэння новых вяршынь. ■
Кацярына САДОЎНІКАВА, метадыст Браслаўскага РЦК
