У музеі традыцыйнай культуры адкрылася прыгожая выстаўка вырабаў майстроў і мастакоў народнага клуба «Ля возера».
На адкрыццё экспазіцыі сабраліся аўтары экспанатаў, прадстаўнікі ўстаноў культуры, браслаўчане. На выстаўку завітала начальнік аддзела ідэалагічнай работы, культуры і па справах моладзі райвыканкама Юлія Чагарына. Яна падзякавала ўсім майстрам за іх творчую працу, пажадала супрацоўнікам музея натхнення і плёну. У 2021 годзе музейныя работнікі неаднаразова станавіліся лепшымі ў розных конкурсах, яны задаюць высокі ўзровень майстэрства сярод сваіх калег, работы браслаўчан ведаюць далёка за межамі раёна. Ю. Чагарына ўручыла падзякі аддзела шэрагу майстроў і супрацоўнікаў установы.
Адкрываючы выстаўку, кіраўнік клуба Наталля Парахневіч адзначыла, што ў ёй бяруць удзел больш за 30 майстроў, а таксама юныя творцы студыі «Акварэлька». На экспазіцыі звыш 220 вырабаў, а самі «Калядныя ўзоры» існуюць з 1997 года. На выстаўцы цікава ўсё: разнастайныя вырабы, побач з прызнанымі майстрамі – новыя імёны. На мерапрыемстве абралі і аўтараў лепшых зорак, зробленых з падручных матэрыялаў. Імі сталі Марына Дворская і дэбютантка выстаўкі – Лізавета Мяркур’ева, навучэнка Ахрэмаўскай школы, якая заняла 1 месца.
Павіншавала з адкрыццём выстаўкі прысутных і загадчык музея Элеанора Зінкевіч. Яна выказала словы падзякі ўдзельнікам і пажадала ім не губляць творчага запалу. Э. Зінкевіч назвала пераможніцу конкурсу «Формула вышывальшчыц», які праходзіў напярэдадні ва ўстанове. «У Браславе шмат жанчын, якія ўмела і прыгожа вышываюць. Дзякуй, што яны паказалі свае работы і пагадзіліся на ўдзел у конкурсе. Перамогу ж у ім па выніках інтэрнэт-галасавання атрымала браслаўчанка Ала Пучынская – сябра клуба «Ля возера», настаўніца СШ № 2 і таленавітая майстрыха», – зазначыла загадчык музея.
Выстаўка будзе працаваць да канца студзеня. Наведайце яе і далучыцеся да чароўнага свету творчасці. ■
