На сходзе працоўнага калектыву работнікі Браслаўскага РЭС адзначылі сваё прафесійнае свята – Дзень энергетыка.
Сёлета споўнілася 90 гадоў энергетычнай сістэме Беларусі. Таму начальнік РЭСа Руслан Лапко пачаў сход з экскурсу ў гісторыю. У прыватнасці, ён нагадаў, што 15 мая 1931 года на базе разрозненых электрастанцый малой магутнасці і лакальных электрычных сетак была створана аб’яднаная Беларуская энергетычная сістэма.
Гісторыя энергетыкі Браслаўскага раёна пачала свой адлік 8 ліпеня 1952 года, калі на беразе возера Дрысвяты беларускія, латвійскія і літоўскія калгаснікі ўрачыста заклалі гідраэлектрастанцыю «Дружба народаў», якая была ўведзена ў эксплуатацыю 12 ліпеня 1953 года магутнасцю 322 кВт.
Руслан Лапко агучыў дастаткова шмат фактаў, якія сведчаць, як на тэрыторыі раёна за мінулыя дзесяцігоддзі ўмацоўваўся энергетычны патэнцыял. А сёння Браслаўскі РЭС абслугоўвае 8 вузлавых падстанцый, 731 трансфарматарную падстанцыю напружаннем 10/0,4 кВ, 1 007,5 км высакавольтных ліній ды 1 069,4 км – нізкавольтных, дзве гідраэлектрастанцыі, якія за 11 месяцаў выпрацавалі 1 млн 613 тыс. кВт·г электраэнергіі пры планавым заданні 1 млн 290 тыс. кВт·г.
Асноўная работа персаналу РЭСа – падтрыманне ў надзейным стане вялікай электратэхнічнай гаспадаркі. І сёлета мясцовыя электраманцёры правялі капітальны рамонт 92,6 км паветраных ліній напружаннем 10 кВ, 111,1 км – нізкавольтных ліній, ста штук – трансфарматарных падстанцый. Таксама для надзейнасці электразабеспячэння спажыўцоў замянілі 19,5 км правадоў на ПЛ 10 кВ і 28,6 км – на ПЛ 0,4 кВ, у 12-і населеных пунктах раёна замянілі апоры ЛЭП.
Апошнім часам браслаўчане дастаткова актыўна выкарыстоўваюць электрычную энергію для патрэб ацяплення і гарачага водазабеспячэння. На цяперашні час РЭС выдаў ужо 540 домаўладальнікам дазволы на асобнае падключэнне да электрасетак з мэтай ацяплення, і 278 абанентаў ужо падключаны. Аднак не ўсюды ёсць і тэхнічныя магчымасці. Таму ў дзяржаўную праграму развіцця энергасістэмы на 2021 – 2025 гады ўключана і рэканструкцыя электрычных сетак 17 аб’ектаў Браслаўскага раёна агульнай працягласцю 37,35 км. Так, на 2022 год запланавана рэканструкцыя ЛЭП у Зараччы, Азяраўцах і Майшулях агульнай працягласцю 8,99 км.
Кіраўнік арганізацыі падзякаваў усяму працоўнаму калектыву за плённую працу, у выніку якой і насельніцтва, і арганізацыі раёна надзейна атрымлівалі электрычную энергію, а за лепшыя вытворчыя паказчыкі ў бягучым годзе 7 работнікаў узнагародзіў ведамаснымі граматамі. Дарэчы, самому Руслану Лапко за добрасумленную працу і прафесійнае майстэрства, асабісты ўклад у развіццё і ўдасканаленне энергетычнай сістэмы Рэспублікі Беларусь прысвоена ганаровае званне «Выдатнік беларускай энергасістэмы». ■
