КУП ЖКГ «Браслаў-камунальнік» – адна з самых буйных арганізацый у раёне. Яе структурныя падраздзяленні знаходзяцца не толькі ў Браславе, а і ў Відзах, Слабодцы, Ахрэмаўцах. Бывае, что месяцамі супрацоўнікі маюць зносіны паміж сабой толькі па тэлефоне. Таму ніколькі не дзіўна, што на карпаратыўныя спаборніцтвы па спартыўнай лоўлі рыбы з’ехаліся звыш трыццаці работнікаў.
Падчас зносін з камунальнікамі зразумеў, што на покліч адміністрацыі і прафсаюза паўдзельнічаць у спаборніцтвах па лоўлі рыбы большасць аматараў такога актыўнага адпачынку адгукнуліся не на падставе амбіцыёзных надзей заваяваць прыз, а пераважна каб пагутарыць з калегамі па рабоце ў нефармальнай абстаноўцы.
З такім настроем рыбаловы-аматары не імкнуліся надалей аддзяліцца адзін ад аднаго, наадварот, рыбачылі ў некалькіх суполках, каб можна было лягчэй абмяняцца ўражаннямі рэдкага ў камунальнай службе выхаднога дня.
Адміністрацыя і прафсаюз разлічвалі менавіта на такі характар спаборніцтваў і добра пастараліся дзеля гэтага: калі праз 4 гадзіны рэгламентаванага рыбалоўства супрацоўнікі камунальнай службы адзін за адным падымаліся па стромкай лесвіцы да агульнага бівака на стаянцы «Юбілейная», іх сустракалі духмянай юшкай, цёплымі шашлыкамі і іншымі смачнымі стравамі на ўлонні прыроды.
Пад узрушаны гоман падвялі і вынікі спартыўнага рыбалоўства. Нельга сказаць, што камусьці ўдалося ўразіць калег сваім рыбацкім шчасцем: максімальны ўлоў склаў усяго толькі 1 200 г, праўда, аж у трох рыбаловаў – у Валерыя Шалыгі з рамонтна-будаўнічага ўчастка, Андрэя Крукоўскага (участак «Відзы») і Арсенія Дзмітрыева (кацельня дома-інтэрната).
Самую вялікую асобіну – акуня на 27 см – з глыбіні звыш 12 м вывудзіў прадстаўнік транспартнага ўчастка Уладзіслаў Сухоўскі, а найменшая рыбінка – даўжынёй у 9,5 см – трапілася Уладзіміру Бейнару з відзаўскага ўчастка. Усе намінанты спартыўнага рыбалоўства атрымалі ў якасці ўзнагароды сертыфікаты на набыццё рыштунку ў спецыялізаваным магазіне. Калегі шчыра ім апладзіравалі і ніколькі не шкадавалі, што не трапілі на прыступку п’едэстала, бо ўсе атрымалі на такім нефармальным мерапрыемстве шмат станоўчых эмоцый, якія запомняцца надоўга. ■
