Дабрачынную акцыю з такой назвай аб’яўляе цэнтралізаваная бібліятэчная сістэма Браслаўскага раёна. Мерапрыемства прымеркавана да Міжнароднага дня дарэння кніг, які штогод 14 лютага адзначае сусветная супольнасць чытачоў.
У гэты дзень аматары друкаванага слова найбольш актыўна абменьваюцца выданнямі між сабой, перадаюць іх дабрачынным і гуманітарным арганізацыям, установам адукацыі і бібліятэкам. Такі рух з’явіўся ў ЗША і цяпер мае сваіх прыхільнікаў у 30 краінах свету.
Запрашаем браслаўчан да канца лютага падзяліцца з бібліятэкамі кнігамі з уласных збораў, якія вы ўжо прачыталі або з якіх «выраслі» вашы дзеці ці ўнукі, часопісамі мінулых гадоў. З радасцю прымуць сучасную і класічную літаратуру розных жанраў у гарадской цэнтральнай і дзіцячай бібліятэках, а таксама ў 11 установах, размешчаных у аграгарадках раёна. Кругласутачна можна пакінуць свае дары ў кніжным доміку Свабоднай вулічнай бібліятэкі ў Браславе.
Напярэдадні дабрачыннай акцыі, якая праводзіцца ўжо 5-ы раз, супрацоўнікі бібліятэчнай сістэмы дзякуюць усім жыхарам раёна, якія перадавалі кнігі з асабістых калекцый на працягу года: такіх актыўных памочнікаў налічваецца больш як 20. Мясцовыя бібліятэкары штогод прымаюць ад неабыякавых чытачоў каля 500 кніг. Сярод іх пераважаюць мастацкія творы вядомых аўтараў, але трапляюцца і іншыя выданні. Напрыклад, надрукаваная ў 1959 г. «Кніга карысных парад» на 850 старонак, з якой шмат чаго можна даведацца і цяпер.
Паважаныя браслаўчане! Нават ад маленькай добрай справы свет робіцца лепшым. Таму далучайцеся да дабрачыннай акцыі і дзяліцеся з бібліятэкамі друкаванымі выданнямі. ■
Ірына МАКАРЭВІЧ, загадчык аддзела бібліятэчнага маркетынгу
