Восеньскія работы на палях заканчваюцца ў тым ліку і абмалотам кукурузы на зерне. СВК «Маяк Браслаўскі» тры гады таму назад даказаў, што і на Браслаўшчыне магчыма не толькі вырасціць добры ўраджай кукурузы, а і дачакацца яе выспявання, каб атрымаць зерне.
Па прыкладзе «Маяка» некаторыя іншыя гаспадаркі таксама паспрабавалі пасеяць каралеву палёў на большай плошчы, каб пасля абмалаціць. У мінулым годзе, напрыклад, гэта атрымалася ў «Слабодцыагра». Сёлета многія разлічвалі павялічыць вал збожжавых культур за кошт кукурузы, але аказалася, што не ўсё так проста.
Па-першае, падвяло надвор’е і кукурузнае зерне вельмі спазнілася з тэрмінам паспявання. Па-другое, убіраць «каралеву» актыўна «дапамагалі» дзікі, таму многія кіраўнікі вырашылі лепш паспяшыць і запасціся сакавітым кормам з яе, чым дарма скарміць дзікай жывёле.
А вось «Маяк Браслаўскі» і сёлета ўсё ж дачакаўся выспявання кукурузных пачаткаў. Усяго тут пакінулі для абмалоту 350 га. На раніцу панядзелка заставалася толькі 150 га. Уборка вядзецца двума камбайнамі, якія пакуль намалацілі 1 801 тону зерня пры сярэдняй ураджайнасці 85 цэнтнераў з гектара. Як расказала галоўны аграном гаспадаркі Валянціна Таўкінь, уборка кукурузы праводзіцца выбарачна, па меры яе выспявання, таму некаторыя палі з высокай ураджайнасцю яшчэ чакаюць свайго часу. І хоць да 110 ц/га, як летась, хутчэй за ўсё, «маякоўцы» не дацягнуць, але для гэтага года і такая ўраджайнасць – неблагі вынік.
Не апусцілі рукі сёлета і ў «Слабодцы-агра». Тут абмалацілі 40 гектараў кукурузы, з якіх у свіран засыпалі 130,6 тоны зерня пры ўраджайнасці 32,7 ц/га.
Больш у раёне ніхто ў гэтым годзе не дачакаўся паспявання «каралеўскага» зерня. ■
