Напэўна, ніводны чалавек, які бываў на фермах сельгасарганізацый нашага раёна, не будзе спрачацца з тым, што ў СВК «Маяк Браслаўскі» яны ўсе ўзорныя. Кіраўніцтва гаспадаркі імкнецца стварыць максімальна камфортныя ўмовы як для працы работнікаў, так і для вырошчвання прадукцыйнага статка. Тут упэўнены: малако ў каровы не толькі на языку — яно складаецца са шматлікіх акалічнасцей, адна з іх — камфорт
Тры гады таму назад «маякоўцы» вырашылі аднавіць памяшканні для вырошчвання жывёлы. Сваімі сіламі і за адносна невялікую суму адна за адной у гаспадарцы сталі з’яўляцца абноўленыя фермы. Так за тры гады тут пабудавалі тры новыя сучасныя будынкі для ўтрымання жывёлы. Мала таго, што такая «абноўка» вывела жывёлагадоўлю гаспадаркі на новы ўзровень, з гэтага пачалося і пахаванне старых ферм, якія сталі прыносіць шкоду прыродзе ды і проста мелі непрывабны выгляд.
Першы будынак узвялі на далёкаўскіх землях у 2018 годзе. У светлым памяшканні з добра прадуманай вентыляцыйнай сістэмай і вялікай выгульнай пляцоўкай, зручным кармавым сталом сёння адначасова гадуецца 250 цёлак. А абслугоўваюць іх усяго два работнікі: загадчыца фермы Таццяна Скур’ят і жывёлавод Сяргей Лібік.
Яны расказалі, што рады прадастаўленай кіраўніцтвам гаспадаркі магчымасці працаваць у такіх умовах.
І на самай справе, будынак новы, прыгожы, усё прадумана не толькі для камфорту жывёлы, а і для работнікаў фермы. Напрыклад, цёплае і ўтульнае памяшканне для адпачынку з усім неабходным. Раздача кармоў і выдаленне гною праводзіцца механізаваным спосабам, пад’езд да фермы заасфальтаваны: так не наносіцца шмат бруду ў памяшканне з жывёлай. На ферме заўсёды пануе чысціня і парадак, а сытая жывёла добра прыбаўляе ў вазе і дзякуе гаспадарам малаком. ■
