Надвор’е спрыяе аграрыям Браслаўшчыны развярнуць работы па корманарыхтоўцы

Экономика и финансы
Пагодлівыя дні нарэшце далі аграрыям Браслаўшчыны развярнуць работы па корманарыхтоўцы. За апошніх пяць дзён без дажджу сельгаспрадпрыемствы раёна імкнуліся насушыць сена як мага больш. Так, на ўчарашні дзень у раёне скошана 4 828 гектараў траў першым укосам, нарыхтавана 15 687 тон сенажу і 888 тон сена, у той час як яшчэ тыдзень таму назад сена было назапашана толькі 103 тоны.

Самае вялікае пагалоўе буйной рагатай жывёлы ў раёне ў ААТ «Агравідзы», таму і нарыхтаваць кармоў тут трэба больш за ўсіх. Работнікі гаспадаркі добра разумеюць гэта, таму кожны год прыкладаюць максімум намаганняў, каб запасціся сакавітым кормам на ўвесь зімова-стойлавы перыяд.

У «Агравідзах» першым укосам скасілі 29 % траў, з якіх нарыхтавалі 71 тону сена, 2903 тоны сенажу ды 473 тоны закруцілі ў стрэйчплёнку. Пакуль гэта ўсяго толькі 2,43 цэнтнера кармавых адзінак на ўмоўную галаву жывёлы пры неабходным мінімуме 25 ц к. адз.

Сянажныя траншэі ў гаспадарцы закладаюць, выконваючы ўсе вытворчыя стандарты. Трамбуе зялёную масу на МТЗ-3022 Леанід Арсоба. Ужо не першы год ён заняты на гэтай важнай аперацыі, таму можа выконваць яе, як кажуць, з заплюснутымі вачыма.

Механізатары спяшаюцца і працуюць ад цямна да цямна, бо добра разумеюць, што летні дзень год корміць. ■

Вольга ПАТАПОВІЧ