Летась будаўнікі з розных рэгіёнаў вобласці выканалі ў Браславе сапраўды маштабныя работы, у тым ліку правялі капітальны рамонт 17 шматкватэрных дамоў, на што было з бюджэту выдзелена 3,4 млн рублёў. Дадзеныя сродкі цалкам асвоены. Але жыхары некаторых з гэтых дамоў яшчэ і сёння скардзяцца на неліквідаваныя дэфекты, дапушчаныя падчас рамонтных работ, дваровыя праезды з ямамі.
Падчас капрамонту жылля была ўстаноўлена неабходнасць правядзення дадатковых работ, не прадугледжаных праектам, для выканання якіх патрабавалася ўзгадненне з адпаведнымі арганізацыямі і, вядома ж, пэўны час. Таму тэрміны завяршэння капітальнага рамонту былі перанесены.
У адпаведнасці з дагаворам будаўнічага падраду паміж «Браслаў-камунальнікам» і наваполацкім КУП «Жыллёва-рамонтная эксплуатацыйная арганізацыя» (генеральны падрадчык) гарантыйны тэрмін на выкананыя работы складае 5 гадоў. Таму дэфекты, выяўленыя ў гэты перыяд, ліквідуе сваімі сіламі і за свой кошт генпадрадчык.
Цяпер, напрыклад, «Браслаў-камунальнік» сумесна з генпадраднай арганізацыяй займаюцца аднаўленнем пашкоджанай апрацоўкі сцен пад’ездаў пасля завяршэння электрамантажу, ліквідацыяй дэфектаў.
Што тычыцца правядзення работ па добраўпарадкаванні тэрыторый каля шматкватэрных дамоў, дзе праведзены капрамонт, то ў адпаведнасці з п. 4 Пастановы № 324 у пералік работ яны не ўключаны.
Пры ўзнікненні якіх-небудзь пытанняў адносна жылых дамоў, дзе ў 2019 годзе праходзіў капітальны рамонт, «Браслаў-камунальнік» прапануе звяртацца па наступных нумарах тэлефонаў: 60-4-24, 31-3-76. ■
Казімір ПЯТУШКА.
Фота аўтара.
