За апошнія гады ў нашай краіне значна павялічылася колькасць аўтамабіляў, якія знаходзяцца ў асабістым карыстанні грамадзян. З гэтай акалічнасцю напрамую звязаны рост крадзяжоў маёмасці з машын, у тым ліку на Віцебшчыне. Асабліва актуальнай тэма стала напрыканцы года.
Цікава, што зламыснікаў не палохае і пакаранне за такія злачынствы, якое ў залежнасці ад абставін і цяжару зробленага можа вагацца ад штрафу да дзесяці гадоў пазбаўлення волі.
— З аналізу крадзяжоў вынікае, што ўладальнікі аўтамабіляў часта саманадзейна ставяцца да захаванасці сваёй маёмасці, — тлумачыць начальнік аддзялення крымінальнага вышуку Браслаўскага РАУС Яўгеній Крумін. — Напрыклад, на бачных месцах у салонах машын вадзіцелі і пасажыры пакідаюць барсеткі, жаночыя сумачкі, кашалькі, мабільныя тэлефоны, упрыгажэнні, дробны электраінструмент. Нярэдка пры пастаноўцы аўтамабіля на стаянку ўладальнікі не здымаюць панэлі аўтамагнітол, навігатары, відэарэгістратары, а таксама не зачыняюць бакавое шкло. Такія абставіны з’яўляюцца свайго роду правакацыйнымі, і тады чалавек, які загадзя не меў спланаванага намеру на крадзеж маёмасці, убачыўшы ў салоне аўто лёгкадаступныя каштоўныя рэчы, можа яго здзейсніць.
Калі вы сталі відавочцам крадзяжу з аўтамабіля, не заставайцеся абыякавымі: запомніце прыкметы злачынцаў, пры наяўнасцi ў iх аўтатранспарту запішыце мадэль і дзяржаўныя рэгістрацыйныя знакі і неадкладна паведаміце ў міліцыю па тэлефоне 102.
Каб не стаць ахвярай злодзея, праваахоўнікі раяць выконваць элементарныя правілы засцярогі:
• устанавіце ахоўную сігналізацыю, якая калі і не выключыць цалкам магчымасць здзяйснення крадзяжу з вашага аўтамабіля, то ў шэрагу выпадкаў адпудзіць верагодных злачынцаў;
• не пакідайце аўтамабіль пасля паломкі на працяглы час на ўзбочынах аўтадарог. Лепш звярніцеся па дапамогу да сваіх знаёмых, каб яго адбуксіраваць, альбо скарыстайцеся паслугамі эвакуатара;
• пры наяўнасці гаража не пакідайце аўтамабіль на неахоўных стаянках паблізу дома;
• пакідаючы машыну на пляцоўках каля магазінаў і ў дварах, перад адыходам правярайце закрыццё дзвярэй і шкла. Пры гэтым прыбірайце з бачных месцаў навігатары, аўтамагнітолы са здымнай панэллю.
Браслаўчанам — жыхарам шматкватэрных дамоў у мэтах прафілактыкі крадзяжоў і іншых злачынстваў, у тым ліку звязаных з замахам на жыццё і здароўе грамадзян, міліцыянеры рэкамендуюць сумеснымі намаганнямі абсталяваць дваровую тэрыторыю сістэмамі відэаназірання. Такія прыклады ўжо ёсць, і яны даказалі сваю эфектыўнасць.
Памятайце, што захаванасць вашага аўтамабіля і рэчаў у ім шмат у чым залежыць ад уласнай пільнасці і абачлівасці. ■
Вера БУЛАНАВА.
