Сярод свят асабліва шануюць вернікі Вялікдзень. Ён вылучаецца не толькі сваёй значнасцю і ўзнёсласцю, але і працягласцю: праваслаўныя адзначаюць яго аж сорак дзён. У ліку ўрачыстасцей сталі традыцыйнымі велікодныя сустрэчы, што ладзяць у гарадах і вёсках. У мінулую нядзелю сабраліся на такое мерапрыемства многія браслаўчане, завітаў на яго і заўсёды чаканы высокі госць — архіепіскап Полацкі і Глыбоцкі Феадосій.
Правячы архіерэй правёў літургію ў храме Успення Прасвятой Багародзіцы, падчас якой яму саслужылі свяшчэннікі Браслаўскай акругі, і даў настаўленне прыхаджанам, заклікаў іх да цярпення і клопату не толькі пра цела, а і пра душу.
Затым уладыка Феадосій прыняў удзел у «Велікодных сустрэчах», што адбыліся ў актавай зале гімназіі.
Урачыста віншуючы прысутных, ён нагадаў, што апошні вясновы месяц аб’яднаў у далёкім 1945-м два святы: у пачатку мая прагучалі апошнія залпы ў Берліне і ў той жа час праваслаўныя адзначалі Вялікдзень, у чым бачыцца дзіўная сімволіка, Божы знак. Архіепіскап Полацкі і Глыбоцкі заклікаў шанаваць прадстаўнікоў старэйшага пакалення, якія ў гады вайны не забываліся пра любоў да бліжняга, аддавалі сваё жыццё за свабоду Айчыны.
З прывітальным словам выступіў старшыня райвыканкама Аляксандр Баданін. Ён падзякаваў высокаму госцю за ўвагу да браслаўскай зямлі і адзначыў, што з такой духоўнай падтрымкай умацоўваецца ўпэўненасць у здзяйсненні задуманых планаў і пачынанняў. Старшыня раённага Савета дэпутатаў Ніна Пучынская ў сваю чаргу засяродзіла ўвагу на тых шматлікіх дабрачынных якасцях, прыклад якіх дае сваім служэннем уладыка Феадосій, і павіншавала яго з нядаўнім днём анёла.
Прадоўжылася мерапрыемства канцэртнай праграмай, падрыхтаванай творчымі калектывамі ўстаноў адукацыі і нядзельнай школы.
Жанна БЯЛЬКО.
Фота аўтара.
