За гады вучобы на філалагічным факультэце кніга зрабілася неад’емнай часткай майго жыцця. Між тым цяпер, на жаль, не так многа людзей, якіх прывабліваюць кніжныя старонкі. Мы ўсе чулі з дзяцінства, быццам чытанне карыснае. Што ж яно дае чалавеку? Прапаную некалькі фактаў, якія пацвердзяць карысць чытання.
РОБІЦЬ ЛЮДЗЕЙ ШЧАСЛІВЫМІ
Да такой высновы прыйшлі вучоныя Ліверпульскага ўніверсітэта. Яны апыталі каля 4 тыс. чалавек і высветлілі, што людзі, якія чытаюць, менш пакутуюць ад дэпрэсіі, лягчэй спраўляюцца з праблемамі і валодаюць больш высокай самаацэнкай.
РАЗВІВАЕ ЎЯЎЛЕННЕ
Цікавая кніга дазваляе нам нібы ўбачыць і перажыць тое, пра што піша аўтар. Чалавек, які шмат чытае, можа сфармуляваць адразу некалькі добрых ідэй і прымяніць іх на практыцы. Тым самым павышаецца ўзровень крэатыўнасці і развіваецца нестандартнае мысленне.
РОБІЦЬ НАС МАЛАДЗЕЙШЫМІ
Даўно ўжо даказана, што маладосць цела напрамую залежыць ад маладосці мозгу. А паколькі начытаны чалавек актыўна выкарыстоўвае і развівае свой мозг, трымае яго ў тонусе, то і на агульным стане арганізма гэта будзе адбівацца толькі станоўча. Так что чытаем і маладзеем!
ПАВЯЛІЧВАЕ НАШ СЛОЎНІКАВЫ ЗАПАС
Калі мы чытаем, то сутыкаемся з незнаёмымі словамі, тэрмінамі, якія звычайна не выкарыстоўваем у паўсядзённым жыцці. Можна пашукаць значэнне ў слоўніку або проста паспрабаваць зразумець яго ў кантэксце.
ДАПАМАГАЕ НАМ АДПАЧЫЦЬ
Сучаснае жыццё пастаянна заганяе ў стрэс, і нават пасля работы, вучобы чалавек застаецца ў напружанні. Чытанне кніг — больш дзейсны спосаб расслаблення, чым баўленне часу за камп’ютарам або тэлевізарам. Добрая кніга спрыяе вяртанню псіхікі ў стан спакою.
ПАШЫРАЕ КРУГАГЛЯД
Агульнавядома, што кніга — скарбніца самых розных ведаў. Літаратурных жанраў незлічоная колькасць: фантастыка, прыгодніцкая літаратура, гісторыя, гумарыстычныя творы і інш. Сярод іх лёгка знайсці нешта пазнавальнае і карыснае для сябе!
ДАПАМАГАЕ ПАЛЕПШЫЦЬ СОН
Па меркаванні вучоных, калі рэгулярна чытаць кожны раз перад тым, як класціся спаць, арганізм прывыкае да такога рэжыму і выпрацоўвае рэфлекс. Такім чынам, чытанне служыць сігналам, што прыйшоў час адыходзіць у царства Марфея.
Вось і падумайце, ці не лепш замест таго, каб марнаваць час на цалкам бескарысныя справы накшталт камп’ютарных гульняў, паддацца станоўчаму ўплыву ідэй з кніг вялікіх людзей. ■
Падрыхтавала Кацярына ЛАБЭЦКАЯ,
студэнтка 3 курса філфака ВДУ імя П. М. Машэрава.
