Значнасць перыядычных выданняў, лічыць дырэктар ЦБС Вольга Ляснеўская, вельмі вялікая, бо менавіта ў газетах і часопісах можна знайсці шмат цікавай і карыснай інфармацыі. А роля раёнкі, у параўнанні з іншымі, яшчэ большая, бо пра жыццё Браслаўшчыны і яе людзей падрабязна раскажа толькі яна.
Сама Вольга Анатольеўна ўжо шмат гадоў выпісвае «Браслаўскую звязду» і кожны раз з цікавасцю гартае яе старонкі. А як чалавек з творчай паэтычнай натурай, свае адносіны да нашага выдання яна выказала ў вершаванай форме.
Жывыя вытокі струменяць, іскрацца
У кожным артыкуле, кожным радку.
Магу я падпісчыкам з гонарам звацца,
Раёнку сяброўкай я вернай лічу.
***
Надзейны рэсурс інфармацыі важнай
І творчы палёт чытачоў-землякоў,
Раённыя будні людзей нашых слаўных
У роднай газеце знаходжу я зноў.
***
Цікава, змястоўна і лаканічна
Кладуцца радкі на паперы фармат.
Працуе рэдакцыя творча, рытмічна,
Каб знацца з раёнкаю кожны быў рад.
***
Чакаю газету заўжды з нецярпеннем,
І рубрыкі ўсе ў пашане ў мяне.
Пішыце ж з задорам і добрым натхненнем,
І творчасці муза хай вас не міне!
