Штогод 14 чэрвеня у розных краінах адзначаюць Сусветны дзень донара крыві. Так мы выказваем удзячнасць людзям, якія добраахвотна і дабрачынна здаюць сваю кроў, патрэбную для выратавання людскіх жыццяў, і павышаем адукаванасць пра неабходнасць рэгулярнага донарства.
Тэма кампаніі гэтага года — донарства крыві як акт салідарнасці. Яна мае на ўвазе такія грунтоўныя каштоўнасці чалавецтва, як альтруізм, павага, спачуванне і дабрыня, якія ляжаць у аснове сістэмы добраахвотнага дабрачыннага донарства крыві. Мы прынялі лозунг «Падумай пра іншых. Здай кроў. Падзяліся жыццём» для прыцягнення ўвагі да таго, што сістэмы добраахвотнага донарства заклікаюць нас клапаціцца пра іншых і фарміраваць сацыяльныя сувязі і згуртаванае грамадства. Арганізатарам асноўнага мерапрыемства Сусветнага дня донара крыві 2018 г. з’яўляецца Грэцыя з дапамогай яе нацыянальнага цэнтра крыві. Яно пройдзе ў Афінах 14 чэрвеня.
У Беларусі бязвыплатнае донарства крыві, яе кампанентаў актыўна развіваецца з 2013 года. За апошніх 5 гадоў колькасць бязвыплатных данацый павялічылася ў 17 разоў, а ў Віцебскай вобласці — у 18. У мінулым годзе найбольшая доля дабрачынных данацый крыві была ў Брэсцкай вобласці (34,2 % ад агульнай колькасці), плазмы — у Гомельскай вобласці (12,8 % ад агульнай колькасці).
У Віцебскай вобласці летась праведзена 88 акцый па бязвыплатнай здачы крыві і яе кампанентаў. Найбольш масавымі былі яны сярод работнікаў і студэнтаў ВНУ — 24 акцыі, у якіх прынялі ўдзел 1 202 чалавекі.
Але спыняцца на дасягнутым нельга. Так, у адпаведнасці з глабальнай стратэгіяй дзеянняў Сусветнай арганізацыі аховы здароўя нам неабходна перайсці да 100-працэнтнага добраахвотнага донарства крыві.
Міністэрствам аховы здароўя Беларусі распрацаваны план мерапрыемстваў («Дарожная карта») па развіцці службы крыві на 2018 год, у якім вызначаны мэтавыя паказчыкі развіцця добраахвотнага бязвыплатнага донарства: 25 % данацый цэльнай крыві і 8 % данацый плазмы.
Мы звяртаемся да ўсіх жыхароў раёна з просьбай далучыцца да такой важнай справы, як развіццё бязвыплатнага донарства крыві і яе кампанентаў. Вы можаце ўдзельнічаць у непасрэднай здачы крыві (пры адсутнасці супрацьпаказанняў), у валанцёрскім руху, у арганізацыі донарскіх акцый і многім іншым. А ў сувязі са святкаваннем Сусветнага дня донара крыві выказваем словы ўдзячнасці ўсім донарам крыві і яе кампанентаў. Гонар вам і глыбокая павага за тое, што не засталіся абыякавымі да чужых бедаў і ахвяравалі часцінку сябе для выратавання мноства жыццяў. ■
Іна ВАШКЕВІЧ,
загадчыца аддзялення пералівання крыві ЦРБ.
